कुचबिहार: पञ्चायत चुनाव अघि बिहीबार साँझ मारुगञ्ज ग्राम पञ्चायतको बुथ नम्बर ८/१०० मा भईरहेको बीजेपीको बुथ बैठकमा तृणमूलका स्थानीय कार्यकर्ताहरूले भाजपा कार्यकर्ताहरूमाथि लट्ठीले आक्रमण गरेको आरोप लागेको छ। घटनामा भाजपाका एक बुथ अध्यक्ष घाइते भएका छन्। घटनाको कारण उक्त क्षेत्रमा निकै तनाव भएको थियो। तनावको खबर पाएलगत्तै तुफानगञ्ज पुलिस चौकी घटनास्थल पुगेको थियो। घाइते भाजपा बुथ अध्यक्षलाई तुफानगञ्ज विभागीय अस्पताल लगिएको छ। भाजपाका घाइते बुथ अध्यक्ष रवीन्द्र कार्जी अहिले अस्पतालमा उपचाररत छन्। घटना विरुद्ध तुफानगञ्ज पुलिस चौकीमा उजुरी परेको छ। यो घटनापछि नाटाबारी विधानसभा क्षेत्रका विधायक मिहिर गोस्वामी आज भाजपा कार्यकर्तालाई भेट्न तुफानगञ्ज विभागीय अस्पताल पुगेका थिए।