अलिपुरद्वार: बिहान हिँड्ने क्रममा बाइसनको आक्रमणबाट एक महिलाको मृत्यु भएको छ। घटना आइतबार बिहान कालचिनी ब्लकको उत्तर मेन्दबारी क्षेत्रमा भएको हो। आइतबार बिहान सो क्षेत्रकी ५५ वर्षीया रिमिला हजारी बिहान घुम्न निस्किएकी थिइन्। त्यसपछि जल्दापाडा राष्ट्रिय निकुञ्जको जङ्गलबाट उक्त क्षेत्रमा बाइसन प्रवेश गरेको थियो। बाइसनले रिमिला हजारीलाई आक्रमण गर्दा रिमिला हजारी गम्भीर घाइते भएकी थिइन्। परिवारका सदस्य र वन अधिकारीले रिमिला हजारीलाई उद्धार गरी लताबारी अस्पताल पुर्‍याएकामा ड्युटीमा रहेका चिकित्सकले मृत घोषणा गरेका थिए।