जलपाइगढी: जलपाइगढी जिल्लाको तकिमारी क्षेत्रमा हात्तीको आक्रमणमा एक माध्यमिक परीक्षार्थीको मृत्यु भएपछि मुख्यमन्त्रीले यस क्षेत्रका परीक्षार्थीहरूका लागि विशेष व्यवस्था गरेका छन्। मुख्यमन्त्री ममता ब्यानर्जीले यस घटनाप्रति दुःख व्यक्त गरिसकेका छन्। अब उनले उक्त क्षेत्रमा परीक्षार्थीका लागि विशेष बसको व्यवस्था गर्न निर्देशन दिए। जिल्ला मजिस्ट्रेट मौमिता गोद्रा बसु, राजगञ्जका विधायक खगेश्वर राई, वन अधिकारी शुक्रबार मृतक परीक्षार्थीको घर पुगेर परिवारका सदस्यलाई भेटेका थिए। प्रहरी आयुक्त अखिलेश चतुर्वेदीले प्रशासनको तर्फबाट मृतकका परिवारलाई ५ लाख रुपियाँको चेक हस्तान्तरण गरेका छन्। यस दिन सरकारले क्षेत्रीय माध्यमिक परीक्षार्थीका लागि वन विभागका थप विशेष बस र सवारी साधनको व्यवस्था गरेको छ। शुक्रबार बिहानैदेखि सचेतना अभियान चलिरहेको छ। वन क्षेत्रबाट आवतजावत पूर्ण रुपमा बन्द छ। वनकर्मीले वन क्षेत्रको अनुगमन गरिरहेका छन्।