१३ फरवरीः भाह तकभर बिर्खे धुरा कल्याण समिति, दार्जीलिङको तत्त्वावधानमा आयोजित भाह तकभर विण्टर कप ओपन नक्आउट फूटबल टुर्नामेण्टमा मनोरञ्जन संघ (एम.जे.एस.)-ले फाइनलमा स्थान बनायो। भाह तकभर खेल मैदानमा आइतवार भएको दोस्रो सेमिफाइनलमा एम.जे.एस.-ले गाउँशाला एफसी-लाई पेनल्टी शूट आउटमा ५-३-ले पराजित गऱ्यो। नियमित समयको खेलमा एम.जे.एस.-बाट नयन प्रधान र गाउँशाला एफसी-बाट कौशल प्रधानले गोल गरे। नियमित समय र अतिरिक्त समयमा पनि स्कोर १-१-को बराबरीमा रहँदा म्याचको फसेला पेनल्टी शूटआउटमा भयो। विजेता टीमका गोलकीपर बिबेक मंगरलाई प्लेयर अव् द म्याच चयन गरियो।

अब १९ फरवरीमा हुने टुर्नामेण्टको फाइनलमा एम.जे.एस. र जी.बी सेभेन एफ.सी.-बीच भिड़न्त हुनेछ। टुर्नामेण्टमा च्याम्पियन हुने टीमलाई ट्रफीको साथमा १.५ लाख रुपियाँको नगद पुरस्कार प्रदान गरिनेछ। यसरी नै रनरअप् हुने टीमलाई ट्रफीको साथमा ७० हजार रुपियाँको नगद पुरस्कार प्रदान गरिनेछ।