इस्लामावाद: सोमबार पाकिस्तानको खैबर पख्तुनख्वा प्रान्तको राजधानी पेशावरको पुलिस लाइन क्षेत्रमा रहेको मस्जिदभित्र बम विस्फोट भएको छ। प्रारम्भिक अनुसन्धानमा आत्मघाती हमला भएको बताइएको छ। समाचारअनुसार हमलामा कम्तीमा ४७ जनाको मृत्यु भएको छ भने १५० भन्दा बढी घाइते भएका छन्। विष्फोटको विवरणसहित सामाजिक सञ्जालमा शेयर भइरहेको भिडियोमा मस्जिद भित्रको दृश्य देख्न सकिन्छ।

पुलिसले आत्मघाती बम विस्फोट भएको आशंका गरेको छ। प्रारम्भिक अनुसन्धानले आक्रमणकारीले प्रार्थनाको बीचमा आफूलाई विस्फोट गराएको देखाएको छ। विस्फोटमा ज्यान गुमाउनेमा अधिकांश पुलिस रहेको बताइएको छ। विस्फोट यति शक्तिशाली भएको हुँदा मस्जिदको एक भागमा क्षति पुगेको छ। उद्धार टोली र सुरक्षा बल घटनास्थलमा पठाइएको छ। सामाजिक सञ्जालमा शेयर भइरहेका भिडियो र तस्वीरमा रगतले लतपतिएका घाइतेहरू  देख्न सकिन्छ। घाइतेहरूलाई उपचारका लागि पेशावरको लेडी रिडिङ अस्पतालमा लगिएको छ। अस्पतालले उपचारका लागि रक्तदान गर्न अपिल गरेको छ। धेरैले यस आक्रमणको पछाडि आतंकवादी संगठन टीटीपीलाई दोष दिइरहेका छन्। पछिल्ला महिनाहरूमा टीटीपीले पाकिस्तानमा धेरै ठूला आक्रमणहरू गरेको छ, जसमा पाकिस्तानी सैनिकहरू व्यापक रूपमा घाइते भएका छन्। पाकिस्तानमा नयाँ सेना प्रमुखको नियुक्तिपछि आतंकवादी संगठनले युद्धविराम अन्त्य गर्ने र देशभर आक्रमण गर्ने घोषणा गरेको थियो।

विष्फोट निकै शक्तिशाली भएको हुनाले यसको आवाज धेरै किलोमिटर टाढासम्म सुनिएको समाचारमा जनाइएको छ। संवेदनशील क्षेत्रमा यस्तो घटनाले मानिसहरूलाई चकित बनाएको छ किनभने मानिसहरू यहाँ आउन धेरै पुलिस चेक पोस्टहरू पार गर्नुपर्ने हुन्छ। पाकिस्तानमा यस्ता विस्फोटहरू प्राय: कट्टरपन्थी शिया मस्जिदहरूलाई लक्षित गर्छन्। गत वर्ष धेरै शिया मस्जिदहरूलाई आत्मघाती हमलाकारी प्रयोग गरेर निशाना बनाइएको थियो।