युक्रेन र रुसबीचको युद्ध १०१ दिन भइसक्यो तर रोकिने कुनै छाँटकाँट देखिएको छैन। युद्धको बीचमा शनिबार दुवै देशका सेनाले युद्धमा मारिएका सैनिकहरुको शव एकअर्कालाई बुझाएका छन्। २ जूनमा दुई देशले जापोरिझ्झ्या ओब्लास्टमा फ्रन्ट लाइनमा रहेका आफ्ना १६० सैनिकको शव एकअर्कालाई हस्तान्तरण गरेको युक्रेनी मन्त्रालयले जनाएको छ। रुसी आक्रमणका कारण करिब १ करोड ४० लाख युक्रेनी नागरिक घर छोडेर भागेका छन्। युक्रेनी राष्ट्रपति भोलोडिमिर जेलेन्स्कीले अमेरिकी मेयरहरूलाई रुसी शहरहरूसँग सम्बन्ध तोड्न आग्रह गरेका छन्। मेयरहरूको अमेरिकी सम्मेलनलाई सम्बोधन गर्दै उनले यी हत्याराहरूलाई आफ्नो दाजुभाइ र दिदीबहिनी भन्न नदिन आग्रह गरे। जेलेन्स्कीले युद्धपछि युक्रेनको पुनर्निर्माणमा सहयोग गर्न पनि आग्रह गरेका छन्।

अमेरिकी जनरलले पश्चिमी देशहरूलाई जतिसक्दो चाँडो युक्रेनमा लडाकु विमान पठाउन आग्रह गरेका छन्। क्यालिफोर्निया नेशनल गार्डका कमाण्डर मेजर जनरल डेभिड बाल्डविन भन्छन्, ‘सोभियत संघले बनाएको मिगहरू छोटो अवधिमा सबैभन्दा राम्रो समाधान हुनसक्छ।’ पोल्याण्डका उप-अर्थमन्त्री पावेल जाब्लोन्स्कीले भने, ‘ईयुले रुसविरुद्ध प्रतिबन्धको सातौँ प्याकेजमा काम गरिरहेको छ। रुसले अझै पनि ग्यास बेच्नसक्छ, त्यसैले प्रतिबन्धहरू अझ कडा हुनुपर्छ।’ फ्रान्सेली राष्ट्रपति इमानुएल म्याक्रोनले युक्रेनको युद्ध रोकिएपछि कूटनीतिक समाधान खोज्न रुसलाई अपमानित नगर्न आह्वान गरेका छन्। युद्ध रोक्न फ्रान्सले मध्यस्थताको भूमिका निर्वाह गर्ने उनको विश्वास छ। युक्रेनले मिकोलिभमा रुसी गोलाबारीमा तीनजनाको मृत्यु भएको र चारजना घाइते भएको आरोप लगाएको छ। मिकोलिभका मेयर अलेक्जेन्डर सिन्केभिचका अनुसार शनिबार रुसी आक्रमणमा तीनवटा अग्लो भवनमा पनि क्षति पुगेको छ।