भारतीय क्रिकेट टीमले साल २०२३-मा असाधारण प्रदर्शनको क्रम जारी राख्यो। श्रीलंकापछि भारतीय टीमले न्यूजील्याण्ड विरुद्ध पनि तीनवटा म्याचको वनडे इण्टरनेशनल सीरीज ३-०-ले क्लीन स्वीप गऱ्यो। मंगलवार खेलिएको सीरीजको तेस्रो तथा अन्तिम म्याचमा भारतले न्यूजील्याण्डलाई ९० रनले पराजित गऱ्यो। चाखलाग्दो कुरा के छ भने भारतले गत पाँचवटा म्याचमा ३०० भन्दा अधिकको स्कोर बनायो। टीमले अझ एउटा द्विपक्षीय सीरीज जितेपछि भारतीय कप्तान रोहित शर्मालाई निक्कै खुशी देखियो। म्याचपछि उनले भने, गत ६ वटा वनडे म्याचमा हाम्रो निम्ति धेरै कुराहरू सही रह्यो। सिराज र शमी बिना हामी बेञ्चमा रहने अन्य खेलाड़ीहरूलाई मौका दिन चाहन्थ्यौं। म्याच अनुभवको निम्ति हामी उमरानलाई चहलसँग मिश्रणमा ल्याउन चाहन्थ्यौं। हामीले बोर्डमा पर्याप्त रन बनाएका थियौं तर यस प्रकारको मैदानमा कुनै पनि टीम सुरक्षित हुँदैन।

रोहितले शार्दुल ठाकुरको प्रशंसा गरे, जसले म्याचमा ब्याट र बलको साथ असल प्रदर्शन गरे। उनले भने, शार्दुलले यस्तो (समय-समयमा विकेट लिएर साझेदारी तोड़्नु) गर्दै आएका छन्। यसैकारण मानिसहरूले उनलाई जादूगर पनि भन्छन्। यसबाहेक कुलदीपले पनि हरेक समय विकेट निकाले। यहाँ लामो खेल्नु अनि टीमलाई असल स्कोरसम्म लैजानु महत्त्वपूर्ण थियो। ईमानदारीपूर्वक भन्नु पर्दा हामी ऱ्याङकिंगबारे धेर चर्चा गर्दैनौं। अब अष्ट्रेलिया विरुद्ध टेस्टको चुनौती सजिलो हुनेछैन। यसैकारण हामी तयार छौं। उल्लेखनीय छ, मंगलवार रोहितले आफ्नो वनडे करियरको ३०औं शतक बनाएर सर्वाधिक शतक बनाउनेहरूका सूचीमा अष्ट्रेलियाका रिकी पण्टिंगको बराबरी गरे। रोहितले ११०१ दिनपछि वनडे शतक बनाए। यसअघि उनले अन्तिमपल्ट चिन्नास्वामी स्टेडियममा अष्ट्रेलिया विरुद्ध १९ जनवरी २०२०-मा शतक बनाएका थिए।

के भयो म्याचमा
इन्दौरको होल्कर क्रिकेट स्टेडियममा मंगलवार खेलिएको म्याचमा टस हारेर पहिला ब्याटिंग गर्दै भारतले कप्तान रोहित शर्मा (१०१) र शुभमन गिल (११२)-को शतकीय ईनिंग्सको सहायताले ५० ओभरमा ९ विकेट गुमाएर ३८५ रन बनायो। हार्दिक पाण्ड्याले ५४ रन (३८ बल, ३ वटा चौका, ३ वटा छक्का)-को योगदान दिए। रोहितले ८५ बल खेलेर ९ वटा चौका र ६ वटा छक्का लगाए। यसरी नै गिलले ७८ बल खेलेर १३ वटा चौका र ५ वटा छक्का लगाए। जवाफमा न्यूजील्याण्ड ४१.२ ओभरमा २९५ रन बनाएर अलआउट भयो। डेवोन कनवेले १०० बलमा १२ वटा चौका र ८ वटा छक्काको साथ सर्वाधिक १३८ रन बनाए। यसबाहेक हेनरी निकोल्सले ४२ रनको योगदान दिए। भारतीय बलरहरूमा शार्दुल ठाकुर र कुलदीप यादवले ३-३ विकेट लिए। शार्दुलले प्लेयर अव् द म्याच र गिलले प्लेयर अव् द सीरीजको पुरस्कार जिते।