खरसाङ गोर्खा हिल स्पोर्ट्स एसोसिएशन (केजीएचएसए)-को तत्त्वावधानमा आयोजित खरसाङ शहीद गोल्ड कप फूटबल टुर्नामेण्टको दशौं संस्करणमा कालेबुङ पुलिस क्वार्टर फाइनलमा पुग्यो। खरसाङ नजिक चानमारी खेल मैदानमा आज भएको म्याचमा कालेबुङ पुलिसले युनाइटेड खरसाङ फूटबल क्लब (यूकेएफसी)-लाई २-१-ले पराजित गऱ्यो। विजेता टीमबाट दुवै गोल अनिमेश गुरुङले छिराए। यूकेएफसी-बाट साहिल राईले गोल गरे। कालेबुङ पुलिसका अनिमेश गुरुङलाई प्लेयर अव् द म्याच चयन गरियो। अब शनिवार खेलिने पहिलो क्वार्टर फाइनल म्याचमा कालेबुङको युनाइटेड ब्रदर्स र युनाइटेड दिलाराम एफसी-बीच भिड़न्त हुनेछ। खेलकुद एवम् युवा मामिला विभाग (जीटीए)-को सहयोगमा भइरहेको यस प्रतिष्ठित टुर्नामेण्टमा १२ वटा नामी-दामी टीमहरूलाई स्थान दिइएको छ।

टुर्नामेण्टको दुईवटा सेमिफाइनल क्रमशः २७ र २८ जनवरीमा खेलिनेछ। यसरी नै फाइनल ३० जनवरीमा हुनेछ। टुर्नामेण्टमा च्याम्पियन हुने टीमलाई आकर्षक ट्रफीको साथमा १.५ लाख रुपियाँको नगद पुरस्कार प्रदान गरिनेछ। यसरी नै रनरअप् हुने टीमलाई आकर्षक ट्रफीको साथमा १ लाख रुपियाँको नगद पुरस्कार प्रदान गरिनेछ।