गान्तोक-आज सिक्किम डेमोक्रेटिक फ्रण्ट (एसडीएफ)-को सिक्किम बचाउ अभियानको आठौं दिन पार्टी अध्यक्ष पवन चामलिङ रिञ्चेनपोङ समष्टिका झुसिङथाङ, माङबीर, सुलडुङ, कामलिङ, ताकुथाङ, मङ्गलबारे, जील, नयाँबस्ती आदि गाउॅंहरूको भ्रमण गरे। स्थानीय जनताले चामलिङलाई अपार उत्साह र हर्षोल्लाससहित भव्यतापूर्वक स्वागत जनाएको जानकारी एसडीएफले प्रेस विज्ञप्तिमा दिएको छ।

विज्ञप्ति अनुसार, अभियानका क्रममा चामलिङले हरेक जनतासॅंग भेट गरेर उनीहरूका गुनासो, वस्तुस्थिति र अवस्थाहरूको जायजा प्रत्यक्ष रूपमा लिइरहेका छन्। जनताले आफ्नो अवस्था, दुःख र समस्याहरू चामलिङलाई साझा गर्दै २०२४-को चुनाउमा एसडीएफ पार्टीलाई सरकारमा पुऱ्याउन आफूहरू प्रतीक्षारत रहेको विचार व्यक्त गरिरहेका छन्।

माङ्बीर गाउँमा एसडीएफ अध्यक्षले स्थानीय जनतालाई सम्बोधन गर्दै आफ्नो चोखो माया सिक्किमका जनताको सुख, शान्ति, खुशी र समृद्धिका लागि समर्पित रहेको बताए। सिक्किमेली जनताले सधैँ सुख, शान्तिको जीवन जिउन पाउन् भनेर मुख्यमन्त्री हुँदा पनि विगतका दिनहरूमा आफूले इमान्दारपूर्वक काम गरेको र अहिले पनि काम गरिरहको उनले बताए। उनले आफ्नो राजनीतिक लक्ष्य जनताका हित, भलो, न्याय र सिक्किमको अस्तित्व र भविष्यको सुरक्षा, विकास र समृद्धि रहेको बताए।

यसरी नै उनले एसडीएफ सरकारमा पञ्चायतलाई विभिन्न अधिकार र अभिभारा दिएको, क्षमता विकेन्द्रीकरण गरी सशक्त तुल्याउने महत्त्वपूर्ण काम गरेको प्रकाश पारे। अहिलेको सरकारले सबै शक्ति र अभिभाराहरू खोसेर पञ्चायतहरूलाई शक्तिहिन, नचल्ने दुवानी बनाएर पञ्चायतको बोलबाला घटेको चामलिङले आरोप लगाए। उनले २०२४ मा एसडीएफ पार्टीको सरकार बनाएर पञ्चायतहरूलाई शक्ति हस्तान्तरण गरी फेरि पनि सशक्त बनाउने बताए।