​गेजिङ: कृषि विभागको तत्त्वावधान तथा कृषि विभाग गेजिङ जिल्लाका उपनिर्देशक डा. कर्मा छेवाङ भोटियाको प्रत्यक्ष पर्यवेक्षण र मार्गदर्शनमा सोमबार ‘खेत बचाउ अभियान’ कार्यक्रम सफलतापूर्वक सम्पन्न भएको छ।
​उक्त कार्यक्रममा गेजिङ जिल्लास्थित ‘कृषि विज्ञान केन्द्र’ का वरिष्ठ वैज्ञानिक एवम् प्रमुख श्री बिषन प्रधानका साथै विभिन्न ग्राम पञ्चायत एकाइका जनप्रतिनिधिहरूको सहभागिता रहेको थियो।
​भारत सरकारको कृषि तथा किसान कल्याण मन्त्रालयद्वारा २२ अक्टोबरदेखि ३१ नोभेम्बरसम्म सञ्चालन हुने गरी यो राष्ट्रव्यापी कार्यक्रम आधिकारिक रूपमा शुभारम्भ गरिएको हो। कृषियोग्य जमिनको संरक्षण र उत्पादक उपयोगलाई प्रवर्धन गर्दै कृषकहरूलाई दिगो कृषि प्रणाली अपनाउन प्रेरित गर्नु यस अभियानको मुख्य उद्देश्य रहेको छ।
​कार्यक्रममा खेतीयोग्य जमिनको संरक्षण, कृषि उत्पादकत्वमा वृद्धि तथा आधुनिक एवम् सुधारिएको खेती प्रविधिमार्फत खाद्य सुरक्षालाई सुदृढ बनाउनुपर्ने विषयमा विशेष जोड दिइएको थियो।
​यसैगरी, उक्त अभियानमा सम्बन्धित विभागका विषय विशेषज्ञ, कृषि विज्ञान केन्द्र गेजिङका विषयगत विशेषज्ञ, स्थानीय कृषकहरूका साथै गेजिङ ब्लकअन्तर्गतका विभिन्न ग्राम पञ्चायतका सर्वसाधारणको उत्साहजनक सहभागिता रहेको थियो।