नयाँ दिल्ली: आईपीएल २०२७ अघि दिल्ली क्यापिटल्सले आफ्नो कोचिंग स्टाफलाई मजबूत गर्ने दिशामा अझ एउटा ठूलो कदम उठाएको छ। फ्रेञ्चाइजीले श्रीलंकाका पूर्व दिग्गज पेस बलर चामिण्डा भासलाई टोलीका बलिंग प्रशिक्षक नियुक्त गरेको छ। यसअघि दिल्ली फ्रेञ्चाइजीले सौरभ गांगुलीलाई मुख्य प्रशिक्षक अनि युवराज सिंहलाई सहायत एवम् ब्याटिंग प्रशिक्षक नियुक्त गरेको थियो। यसपाली भासको नियुक्तिले टोलीको कोचिंग स्टाफमा अन्तर्राष्ट्रिय अनुभवको अझ एउटा ठूलो नाम सामेल भएको छ। फ्रेञ्चाइजीले सोशल मीडियामा एउटा भीडियोको माध्यमले भासको नियुक्तिको घोषणा गरेको छ। दिल्ली क्यापिटल्सलाई अनुभवी प्रशिक्षकहरूका यस समूहबाट टोलीको प्रदर्शनमा सुधार ल्याउनको साथै पहिलोपल्ट आईपीएल खिताब जित्ने सपनालाई साकार गर्नमा सहायता गर्ने आशा रहनेछ। ५२ वर्षीय चामिण्डा भास श्रीलंकाका सबैभन्दा सफल पेस बलरहरूमा सामेल छन्। उनले आफ्नो अन्तर्राष्ट्रिय करियरमा १११ वटा टेस्ट म्याचमा ३५५ विकेट अनि ३२२ वटा वनडे म्याचमा ४०० विकेट लिएका छन्। उनी १९९६-मा विश्व कप जित्ने श्रीलंकाई टोलीको हिस्सा रहेका थिए। देब्रे हातका पेस बलर भासले आफ्नो सटीक लाइन-लेन्थ, नयाँ बललाई स्विंग गराउने असाधारण क्षमता र अलग-अलग परिस्थितिहरूमा प्रभावी बलिंगको साथ आफ्नो छाप छोड़ेका छन्। विशेषगरी टी२० क्रिकेटमा पावरप्ले र डेथ ओभरहरूमा बलिंगको रणनीति तयार गर्नमा उनको भूमिका महत्त्वपूर्ण हुनेछ। भाससँग कोचिंगको असल अनुभव रहेको छ। उनी श्रीलंकाको सीनियर टोली र अन्य अन्तर्राष्ट्रिय टोलीहरूसँग काम गरिसकेका छन्। उनी २०१६ टी२० विश्व कपको अवधि आयरल्याण्डका बलिंग प्रशिक्षक रहेका थिए। उनले न्यूजील्याण्ड टोलीसँग पेस बलिंग सल्लाहकारको रूपमा पनि काम गरिसकेका छन्। उल्लेखनीय छ, दिल्ली क्यापिटल्सले मुख्य प्रशिक्षक हेमंग बदानीको नेतृत्वमा २ सीजन बिताेपछि आफ्नो पुरानो कोचिंग समूहमा बदलाउ गरेको छ। टोलीले २०२५-मा प्लेअफमा स्थान बनाउन सकेको थिएन जबकि २०२६-को सीजनमा टोली छैटौं स्थानमा रहेको थियो। फ्रेञ्चाइजी अहिले नयाँ कोचिंग स्टाफको साथ नयाँ शुरुवात गर्ने प्रयासमा रहेको छ तर केवल ठूलो नामले सफलताको ग्यारण्टी चाहिँ दिँदैन। असली परीक्षा मैदानमा रणनीतिको प्रभावी क्रियान्वयन र खेलाड़ीहरूका प्रदर्शन हुनेछ।