​सिलगढी: ​सिलगढीको मध्यवर्ती इलाका परिवहन नगरस्थित वेबेल आईटी पार्कभित्र गैरकानुनी रूपमा सञ्चालन भइरहेको कल सेन्टरमा माटीगाडा थाना पुलिसले छापा मारी चार महिलासहित नौ जनालाई पक्राउ गरेको छ।
​गएराति चलाइएको उक्त विशेष अभियानको नेतृत्व पूर्व क्षेत्रका पुलिस उपायुक्त चारु शर्मा र सहायक पुलिस आयुक्त रोबिन थापाले गरेका थिए। केन्द्रीय अनुसन्धान ब्युरो (सीबीआई) बाट प्राप्त सूचनाका आधारमा सिलगढी पुलिस आयुक्तालयका विभिन्न थानाका करिब दुई सय पुलिसकर्मीको टोलीले वेबेल आईटी पार्क र लिचुबागानस्थित अर्को आईटी पार्कमा एकसाथ छापा मारेको थियो। राति करिब साढे एक बजेसम्म चलेको तलासी अभियानका क्रममा ठूलो परिमाणमा कम्प्युटर, विद्युतीय उपकरण र कागजातहरू जफत गरिएको छ।
​प्रारम्भिक अनुसन्धानअनुसार ग्राहक सहायता केन्द्रको नाममा साइबर ठगी तथा अवैध वित्तीय कारोबार सञ्चालन भइरहेको थियो, जसमा फर्जी र म्यूल बैंक खाताहरूको प्रयोग गरिएको खुलेको छ।
​सरकारी पूर्वाधारमै रहेको वेबेल आईटी पार्कमा यस्ता अवैध गतिविधि कसरी र कसको मिलेमतोमा सञ्चालन भइरहेका थिए भन्नेबारे पुलिसले सुक्ष्म अनुसन्धान सुरु गरेको छ। पक्राउ परेका आरोपीहरूलाई आज अदालतमा पेस गरी थप अनुसन्धानका लागि पुलिस हिरासतमा लिने तयारी भइरहेको छ।