​गान्तोक: ​सिक्किमका लोकसभा सांसद डा. इन्द्रहाङ सुब्बा लेहमा आयोजित उपभोक्ता मामिला, खाद्य तथा सार्वजनिक वितरणसम्बन्धी संसदीय स्थायी समितिको अध्ययन भ्रमणमा सहभागी भएका छन्।
​जारी प्रेस विज्ञप्तिअनुसार अध्ययन भ्रमणका क्रममा समितिले लद्दाखका मुख्य सचिवको उपस्थितिमा भारतीय खाद्य निगम (एफसीआई) र केन्द्रीय भण्डारण निगम (सीडब्ल्यूसी) का अधिकारीहरूसँग छलफल गरेको छ। सो अवसरमा विकट भौगोलिक क्षेत्रमा खाद्यान्न भण्डारण, वितरण, अत्यावश्यक वस्तुको आपूर्ति तथा सार्वजनिक वितरण प्रणाली (पीडीएस) सञ्चालनमा देखिने चुनौतीबारे समीक्षा गरियो।
​यसैगरी, समितिले उपभोक्ता मामिला विभाग, वित्तीय सेवा विभागका प्रतिनिधि तथा भारतीय स्टेट बैंक, पञ्जाब नेसनल बैंक, युको बैंक, बैंक अफ बडौदा र जम्मू-कश्मीर बैंकका उच्च अधिकारीहरूसँग पनि अन्तरक्रिया गरेको छ।
​छलफलका क्रममा ग्राहक सेवाको गुणस्तर, बढ्दो बैंकिङ तथा वित्तीय ठगी नियन्त्रण, उपभोक्ता सचेतना र सरकारी अनुदानमा आधारित ऋण सुविधाहरूबारे विचार-विमर्श भयो। लक्षित वर्गसम्म सरकारी योजनाहरूको प्रभावकारी पहुँच सुनिश्चित गर्न अपनाउनुपर्ने कदमहरूबारे पनि समितिले जोड दिएको छ।
​यस अध्ययन भ्रमणले उपभोक्ता हित, खाद्य सुरक्षा र वित्तीय समावेशीतालाई सुदृढ बनाउन स्थलगत वस्तुस्थिति र चुनौती बुझ्न महत्त्वपूर्ण सहयोग पुऱ्याएको बताइएको छ।