काठमाडौ: नेपालको रसुवा क्षेत्रमा आएको भीषण बाढीका कारण ज्यान गुमाएका ३३२ जनाको शव फेला परेको छ। नेपाल प्रहरीको केन्द्रीय समाचार कक्षलाई उद्धृत गर्दै प्राप्त विवरण अनुसार बिहीबार अपराह्न ३:५० बजेसम्ममा ३३२ जनाको शव फेला परेको हो।​ बुधबार भोटेकोशी र त्रिशूली नदीमा आएको विनाशकारी बाढीका कारण विभिन्न जिल्लाहरूमा ठूलो धनजनको क्षति भएको छ। प्रहरीका अनुसार बाढीका कारण चितवनमा सबैभन्दा बढी १२१ जनाको शव फेला परेको छ। यसैगरी नवलपरासी पूर्वमा ७४, धादिङमा २९, गोरखामा २९, नुवाकोटमा २८, तनहुँमा १९, रसुवामा १७ र नवलपरासी पश्चिममा १५ जना गरी कुल ३३२ जनाको शव भेटिएको छ।​ बाढीको उच्च जोखिममा रहेका क्षेत्रहरूबाट मानिसहरूलाई सुरक्षित स्थानमा सार्ने काम भइरहेको छ। स्थानीय प्रशासन, सुरक्षा निकाय र स्थानीयवासीको समन्वयमा खोजी तथा उद्धार कार्यलाई तीव्र पारिएको छ। साथै बाढी र पहिरोका कारण अवरुद्ध भएका मुख्य राजमार्ग तथा सडक खण्डहरू खुलाउने कार्य पनि युद्धस्तरमा भइरहेको जनाइएको छ।