सिलगढी: दीपावलीको ठीक अघि आइतवार, सिलगढीको हकर्स कर्नरमा रहेको प्लास्टिकको पसलमा अचानक आगलागी हुँदा चारैतिर त्रास फैलियो। आगलागीको खबर पाउनासाथ दुईवटा दमकल घटनास्थलमा पुगेर आगो निभाउन थालेका छन्। आगो स्थानीयवासी र दमकलको सहयोगमा निकै प्रयासपछि नियन्त्रणमा आएको थियो। यहाँ बजार क्षेत्रमा आगलागी भएको खबर पाएर सिलगढी पुलिस पनि घटनास्थलमा पुगेर स्थितिको जाच लिएका थिए। जानकारी अनुसार सिलगढी हकर्स कर्नरमा रहेको प्लास्टिक पसलमा भीषण आगलागी भएको छ। आगलागीको कारण खुल्न सकेको छैन। दुर्घटनामा कुनै मानवीय क्षति नभएपनि लाखौंको क्षति भएको बताइएको छ। आगलागीको खबर पाएलगत्तै पार्षद सञ्जय शर्मा घटनास्थलमा पुगेर अवस्थाबारे जानकारी लिएका थिए। उनले पीडित पसल र स्थानीय जनतासँग अन्तरक्रिया गरी सक्दो सहयोग गर्ने आश्वासन दिए। यता, दीपावलीअघि नगरको हकर्स कर्नरमा आगलागी भएको खबर पाउनासाथ मेयर गौतम देव पनि घटनास्थल पुगेका थिए। उनले त्यहाँको अवस्थाबारे जानकारी लिए। त्यसपछि सञ्चारकर्मीसँग कुरा गर्दै उनले स्थानीयवासी र दमकलको सहयोगमा आगोलाई छिट्टै नियन्त्रणमा लिएर ठूलो दुर्घटना हुनबाट जोगिएको बताए। उनले हकर्स कर्नरको पुनर्निर्माण महानगरपालिकाले गर्ने बताए।