​दार्जिलिङ: दुर्गा पूजा (दसैँ) तथा पर्यटकीय मौसमलाई ध्यानमा राख्दै दार्जिलिङ हिमालयन रेलवे (डीएचआर) ले आगामी असोज १५ (अक्टोबर १) देखि विशेष ‘जोय राइड’ सेवा थप गर्ने भएको छ। पहाडी सौन्दर्यको आनन्द लिँदै प्रसिद्ध ‘टोय ट्रेन’ को यात्रा गर्न चाहने पर्यटकहरूका लागि रेलवेले यो सेवा विस्तार गर्न लागेको हो।
​डीएचआरका अनुसार दार्जिलिङ-घूम रुटमा चारवटा ‘एकतर्फी’ (सिंगल-ट्रिप) जोय राइड सञ्चालन गरिने छ भने खर्साङ-महानदी रुटमा दुईवटा ‘दुईतर्फी’ (राउन्ड-ट्रिप) विशेष जोय राइड सञ्चालन हुनेछन्।
​दार्जिलिङ-घूम रुटमा सञ्चालन हुने डिजेल इन्जिनयुक्त जोय राइडको भाडा प्रतिव्यक्ति रु ८०० तोकिएको छ। यस्तै, खर्साङ-महानदी रुटमा चल्ने वाष्प इन्जिन (स्टीम-इन्जिन) युक्त विशेष टोय ट्रेनको नाम ‘रेड पाण्डा’ राखिएको छ, जसको भाडा रु १,५३० निर्धारण गरिएको छ।
​यसैगरी, खर्साङ-महानदी रुटमै सञ्चालन हुने दोस्रो डिजेल-इन्जिन जोय राइडको नाम नोबेल पुरस्कार विजेता रवीन्द्रनाथ टागोरको सम्मानमा ‘मुक्तधारा’ राखिएको छ। यसको भाडा रु १,०३० रहनेछ।
​महानदी नजिकै रहेको पगलाझोराको प्राकृतिक सौन्दर्य र यस क्षेत्रको साहित्यिक एवं सांस्कृतिक विरासतको संगमलाई प्रतिविम्बित गर्ने गरी यो नामकरण गरिएको डीएचआरले जनाएको छ। दसैँ-तिहारको छुट्टीमा आउने पर्यटकहरूका लागि यो विशेष सेवाले ऐतिहासिक टोय ट्रेन र दार्जिलिङको मनोरम दृश्य अवलोकनको अविस्मरणीय अनुभव प्रदान गर्ने विश्वास लिइएको छ।