ईटानगर: अरुणाचल प्रदेशका मुख्यमन्त्री पेमा खाण्डूले अमेरिकास्थित प्रतिष्ठित कार्नेगी मेलन विश्वविद्यालयमा भर्ना पाएकी तवाङकी युवा शोधकर्ता नमज्ञाल ल्हामो डोल्मालाई बधाई तथा शुभकामना व्यक्त गरेका छन्।​नमज्ञालले विश्वविद्यालयको प्रतिष्ठित ‘हाइन्ज कलेज फेलोसिप’ हासिल गरेकी हुन्। मुख्यमन्त्री खाण्डूले यसं उपलब्धिलाई तवाङ र समग्र राज्यकै लागि एउटा ठूलो र गर्विलो सफलता भएको बताएका छन्।​सामाजिक सञ्जालमा पोस्ट गर्दै मुख्यमन्त्री खाण्डूले भनेका छन्, “तवाङकी युवा शोधकर्ता नमज्ञाल ल्हामो डोल्माले प्रतिष्ठित हाइन्ज कलेज फेलोसिपसहित अमेरिकाको कार्नेगी मेलन विश्वविद्यालयमा भर्ना पाएको खबर सुन्दा अत्यन्तै खुसी लागेको छ। यो हाइन्ज कलेजको सबैभन्दा प्रतिष्ठित पुरस्कारहरूमध्ये एक हो।”​मुख्यमन्त्री खाण्डूले नमज्ञालका साथै उनका मातापिता पूर्व वरिष्ठ आर्किटेक्ट धावा छिरिङ र प्रञ्जित के. छिरिङलाई पनि बधाई दिएका छन्। अभिभावकको निरन्तर सहयोग र नमज्ञालको कडा मिहिनेत तथा दृढ सङ्कल्पका कारण नै यो सफलता सम्भव भएको उल्लेख गर्दै उनले नमज्ञालको उज्ज्वल र सफल भविष्यको कामना गरेका छन्।