काेलकाता: भारतीय जनता पार्टी (भाजपा) का वरिष्ठ नेता तथा गृहमन्त्री अमित शाहले भारतीय राष्ट्रिय कंग्रेसमाथि तुष्टीकरणको राजनीति गरेको र राष्ट्रिय गीत ‘वन्दे मातरम्’ को अपमान गरेको गम्भीर आरोप लगाएका छन्। कंग्रेस कार्यसमितिको हालैको निर्णयलाई लक्षित गर्दै उनले यो कदमलाई देशविरोधी र विभाजनकारी मानसिकताको निरन्तरता भएको बताएका हुन्।​कंग्रेसले सन् १९३७ को आफ्नो प्रस्तावलाई पछ्याउँदै बंकिमचन्द्र चट्टोपाध्यायद्वारा रचित अमर गीत ‘वन्दे मातरम्’ का सुरुवाती दुई श्लोक मात्र गाउने निर्णय गरेपछि गृहमन्त्री शाहले तीव्र आक्रोश व्यक्त गरेका छन्।​सामाजिक सञ्जालमार्फत आफ्नो धारणा सार्वजनिक गर्दै शाहले भनेका छन्, “सन् १९३७ मा कंग्रेसले मुस्लिम तुष्टीकरणका लागि वन्दे मातरम्‌लाई दुई टुक्रा पारेर देश विभाजनको जग बसालेको थियो। त्यहीँबाट दुई-राष्ट्र सिद्धान्तले बल पाएको थियो र अन्ततः देशको विभाजन भई पाकिस्तानको जन्म भयो।”​सरकारले ‘वन्दे मातरम्’ को १५०औँ वर्षगाँठको अवसरमा बंकिम बाबूको यो कृतिलाई पूर्ण रूपमा गाएर राष्ट्रिय एकता सुदृढ गर्ने प्रयास गरेको र सबै सरकारी कार्यक्रमहरूमा यसलाई पूर्ण रूपमा गाउने कानुनी व्यवस्था समेत गरेको शाहले स्पष्ट पारेका छन्। शाहका अनुसार कंग्रेसले संसद्‌बाट पारित कानुन र सरकारी निर्णयलाई बेवास्ता गर्दै पुनः १९३७ कै गल्ती दोहोर्‍याएको छ।​”राहुल गान्धीको नेतृत्वमा कंग्रेस पार्टीले फेरि एकपटक तुष्टीकरणको राजनीतिलाई अगाडि बढाएको छ,” शाहले थपे, “भोट बैंकका लागि कंग्रेसले बंकिम बाबूको अमर कृतिको मात्र होइन, ‘वन्दे मातरम्’ को नारा लगाउँदै देशको स्वतन्त्रताका लागि फाँसीमा चढेका लाखौँ सहिदहरूको समेत अपमान गरेको छ।”​कंग्रेसको यो निर्णयले उसको घोर तुष्टीकरणको नीतिलाई पुनः पुष्टि गरेको दाबी गर्दै उनले कंग्रेसले संसदीय कानुनभन्दा आफ्नो पुरानो दलीय प्रस्तावलाई माथि राखेको भन्दै कडा शब्दमा आलोचना गरेका छन्।