​गान्ताेक: सिक्किमको राजधानी गान्ताेकस्थित पालजोर स्टेडियममा ८०औँ स्वतन्त्रता दिवस भव्य समारोहका बीच सम्पन्न भएको छ।
​समारोहलाई सम्बोधन गर्दै सिक्किमका मुख्यमन्त्री प्रेमसिंह तामाङ (गोले) ले सरकारले जनताको आवश्यकता र आकांक्षालाई शासनको केन्द्रमा राखी काम गरिरहेको बताए। उनले ‘सुनौलो, समृद्ध र समर्थ सिक्किम’ निर्माणका लागि सरकार निरन्तर प्रतिबद्ध रहेको दोहोर्‍याए। जनताको विश्वास र अटुट समर्थन नै सरकारको मुख्य शक्ति र प्रेरणाको स्रोत भएको उनको भनाइ थियो।

​सो अवसरमा सिक्किमको विकास, सुरक्षा तथा समाजसेवामा विशिष्ट योगदान पुर्‍याउने व्यक्तित्वहरूलाई विभिन्न पुरस्कारबाट सम्मानित गरिएको छ। समारोहमा वीरता पुरस्कार, पुलिस पदक, श्रवण कुमार पुरस्कार र राज्य मेधावी सेवा पुरस्कार प्रदान गरियो।
​यस्तै, सन् २०२५-२६ को कक्षा १० र १२ को बोर्ड परीक्षामा उत्कृष्ट नतिजा ल्याउने विद्यार्थीहरूलाई ‘राज्य मेधावी पुरस्कार’, उत्कृष्ट सहकारी संस्थाहरूलाई ‘मुख्यमन्त्री उत्कृष्ट सहकारी पुरस्कार’ तथा खेलाडीहरूलाई ‘राज्य खेलकुद पुरस्कार’ द्वारा सम्मानित गरिएको छ।

​समारोहको मुख्य आकर्षणका रूपमा विभिन्न टोलीहरूद्वारा प्रस्तुत गरिएको भव्य परेड रहेको थियो। अनुशासित र आकर्षक मार्चपास्ट प्रस्तुत गर्ने सबै सहभागीहरूलाई मुख्यमन्त्रीले धन्यवाद ज्ञापन गर्दै बधाई दिएका छन्।