सांसद राजु विस्टद्वारा ‘स्थायी राजनीतिक समाधान’ र विकासको प्रतिबद्धता व्यक्त

​कालिम्पोङ: दार्जिलिङ, तराई र डुवर्सका बासिन्दाहरूसँगै कालिम्पोङको मेला ग्राउन्डमा आयोजित ८०औँ स्वतन्त्रता दिवस समारोहमा सांसद राजु विस्ट सहभागी भएका छन्।
​कालिम्पोङमा देशभक्तिपूर्ण परम्परा र उत्साहका साथ स्वतन्त्रता दिवस मनाउने प्रचलन रहेको उल्लेख गर्दै सांसद विस्टले यहाँका जनतालाई बधाई ज्ञापन गरे।
​समारोहलाई सम्बोधन गर्दै उनले पहाड, तराई र डुवर्स साझा इतिहास, भूगोल, संस्कृति र आकाङ्क्षाले जोडिएको बताए। फुटको राजनीतिलाई अस्वीकार गर्दै सबै मिलेर एकै परिवारका रूपमा अघि बढ्नुपर्नेमा उनले जोड दिए।
​सम्बोधनका क्रममा विस्टले संवैधानिक, लोकतान्त्रिक र शान्तिपूर्ण माध्यमबाट यस क्षेत्रको स्थायी राजनीतिक समाधानका लागि आफ्नो प्रतिबद्धता दोहोर्‍याए। राजनीतिक आकाङ्क्षासँगै विकास निर्माणका कामहरू पनि सँगसँगै अघि बढ्नुपर्ने उनको भनाइ थियो।
​उनले सडक, पुल, डिजिटल कनेक्टिभिटी, स्वास्थ्य, शिक्षा, पर्यटन र रोजगारी जस्ता पूर्वाधारहरूमा सुधार गर्दै विकासको खाडल पुर्ने र युवाहरूका लागि नयाँ अवसरहरू सिर्जना गर्ने प्रतिबद्धता व्यक्त गरेका छन्।