नीट पेपर लीकविरुद्ध अनशनमा छन् वाङचुक

​नयाँ दिल्ली: नीट पेपर लीक प्रकरणलाई लिएर विगत २८ जुनदेखि अनिश्चितकालीन भोक हडतालमा बसेका सामाजिक अभियन्ता सोनम वाङचुकसँग भेट्न सरकारले वार्ताको पहल गरेको छ। मङ्गलबार राति केन्द्रीय मन्त्री जेपी नड्डा र जितेन्द्र सिंहले गुरुग्रामस्थित मेदान्ता अस्पताल पुगेर वाङचुकसँग भेटघाट गरेका छन्।
​दिल्ली उच्च अदालतको आदेशपछि वाङचुकलाई सफदरजङ अस्पतालबाट मेदान्ता अस्पतालमा सारेलगत्तै दुवै मन्त्री उहाँको स्वास्थ्य स्थिति बुझ्न र कुराकानी गर्न पुगेका हुन्। वाङचुककी पत्नी गीताञ्जली अङ्गमोलले आफ्नो रोजाइको अस्पतालमा उपचार पाउनुपर्ने माग गर्दै दायर गरेको निवेदनमा सुनुवाइ गर्दै अदालतले उहाँलाई मेदान्ता सार्न आदेश दिएको थियो।
​सफदरजङ अस्पतालका अनुसार डिस्चार्ज गर्दा वाङचुकको स्वास्थ्य स्थिति स्थिर रहे पनि प्यानसाईटोपेनियाको समस्या यथावत् रहेको छ। हाल मेदान्ता अस्पतालमा डा. सुशीला कटारियाको टोलीले उहाँको उपचार गरिरहेको छ भने अस्पताल परिसरमा सुरक्षा व्यवस्था कडा पारिएको छ।