लर्ड्सको खेल अन्तिम नभएको बीसीसीआईको स्पष्टीकरण
​

मुम्बई: ​भारतीय क्रिकेट टोलीका कप्तान रोहित शर्माको सन्न्यासलाई लिएर खेल जगतमा व्यापक अड्कलबाजी भइरहेका बेला भारतीय क्रिकेट नियन्त्रण बोर्ड (बीसीसीआई) ले ती हल्लाहरूको पूर्ण रूपमा खण्डन गरेको छ। इङ्ल्यान्डविरुद्ध आइतबार लर्ड्सको ऐतिहासिक मैदानमा हुने तेस्रो एकदिवसीय (ओडीआई) खेल नै रोहित शर्माको अन्तिम अन्तर्राष्ट्रिय खेल हुने भनी फैलिएको हल्लामा कुनै सत्यता नभएको बीसीसीआईले प्रष्ट पारेको छ। बीसीसीआईका सचिव देवाजीत सैकियाले समाचार एजेन्सी पीटीआईसँग कुरा गर्दै रोहितले लर्ड्स खेलपछि सन्न्यास लिन लागेको भन्ने विषयमा बोर्डमा कुनै पनि छलफल वा योजना नभएको दाबी गरेका छन्।
​सचिव सैकियाका अनुसार रोहित शर्मा भारतीय एकदिवसीय टोलीका नियमित र महत्त्वपूर्ण सदस्य हुन् र उनी जबसम्म टोलीको रणनीतिक योजनाको हिस्सा रहन्छन्, तबसम्म देशका लागि निरन्तर खेलिरहने छन्। पछिल्लो समय राष्ट्रिय चयनकर्ताहरूले रोहितलाई सन् २०२७ मा हुने एकदिवसीय विश्वकपको योजनामा समावेश नगरिएको जानकारी गराएको भन्ने खबर बाहिरिएपछि उनी आइतबारको खेलपछि मैदानबाट बाहिरिने अनुमान गरिएको थियो। रोहितले टेस्ट र टी-२० क्रिकेटबाट यसअघि नै सन्न्यास लिइसकेकाले पनि यस पटकको एकदिवसीय शृङ्खला लगत्तै उनले पूर्ण रूपमा खेल जीवनबाट बिदा लिन सक्ने अड्कलबाजी तीव्र बनेको थियो।
​यसैबिच जारी इङ्ल्यान्डविरुद्धको शृङ्खलाका सुरुवाती दुई खेलमा कप्तान रोहित शर्माको ब्याट चल्न सकेको थिएन। पहिलो खेलमा मात्र ११ रन बनाएर आउट भएका रोहितले दोस्रो खेलमा ४७ बल खेल्दै २६ रन मात्र जोड्न सकेका थिए। लगातारको खराब प्रदर्शनका कारण उनको खेल जीवन अब अन्त्यतिर पुगेको भन्दै विभिन्न सञ्चारमाध्यम र सामाजिक सञ्जालमा टिप्पणी भइरहेका बेला बीसीसीआई सचिवको यो आधिकारिक बयानले सन्न्यासको चर्चामा तत्कालका लागि पूर्णविराम लगाएको छ।