युक्रेन युद्ध समाधानका लागि ट्रम्पको प्रस्ताव

​नयाँ दिल्ली: अमेरिकी स्वतन्त्रता दिवसको २५० औँ वर्षगाँठको अवसर पारेर अमेरिकी राष्ट्रपति डोनाल्ड ट्रम्प र रूसी राष्ट्रपति भ्लादिमीर पुटिनबीच झण्डै ९० मिनेट (डेढ घण्टा) लामो टेलिफोन वार्ता भएको छ। नाटो शिखर सम्मेलनको पूर्वसन्ध्यामा भएको यस वार्तामा राष्ट्रपति ट्रम्पले युक्रेन युद्धको समाधान खोज्न र युद्धविराम गराउनका लागि मध्यस्थताको प्रस्ताव राखेका छन्।
​क्रेमलिनका अधिकारी युरी उशाकोभका अनुसार वार्ता प्रोटोकलमा मात्र सीमित नभई निकै रचनात्मक र व्यावसायिक रहेको थियो। सो क्रममा राष्ट्रपति पुटिनले ट्रम्पलाई अमेरिकाको २५० औँ स्थापना दिवसको बधाई दिँदै युद्धभूमिको वास्तविक स्थितिको जानकारी गराएका थिए। पुटिनले रूसी सेना फ्रन्टलाइनमा लगातार अघि बढिरहेको दाबी गर्दै युक्रेन र उसका युरोपेली सहयोगीहरूले द्वन्द्व बढाएको आरोप लगाए। दुवै नेता रूस र अमेरिकाबीच सैन्य, राजनीतिक तथा आर्थिक क्षेत्रमा संवाद जारी राख्न सहमत भएका छन्। यसैबीच, क्रेमलिनका प्रवक्ता दिमित्री पेसकोभले युक्रेनी राष्ट्रपति वोलोडिमिर जेलेन्स्की पुटिनसँग वार्ताका लागि मस्को आउन सक्ने सम्भावना रहेको समेत संकेत गरेका छन्।