‘सीएम-फ्लाइट’ योजना अन्तर्गत युवाहरूलाई अन्तर्राष्ट्रिय रोजगारीको अवसर

​गुवाहाटी: असमका मुख्यमन्त्री डा. हिमन्त विश्व सरमाले आइतबार गुवाहाटीको गरचुकस्थित ‘उत्तर पूर्व सीप केन्द्र’ (एनईएससी) को भ्रमण गरी असम सीप विकास मिसन (एएसडीएम) अन्तर्गत सञ्चालित अन्तर्राष्ट्रिय रोजगारी कार्यक्रमहरूको प्रगतिबारे निरीक्षण तथा समीक्षा गरेका छन्।
​निरीक्षणका क्रममा मुख्यमन्त्री सरमाका साथ ‘आसियान वान कम्पनी लिमिटेड’ का अध्यक्ष एवं सीईओ तोशिएकी निशिकावा, खाद्य, नागरिक आपूर्ति तथा उपभोक्ता मामिला मन्त्री कौशिक राई, मुख्यमन्त्रीका अतिरिक्त मुख्य सचिव डा. के.के. द्विवेदी र एएसडीएमका मिसन निर्देशक हनिफ नूरानी लगायत वरिष्ठ अधिकारीहरूको उपस्थिति रहेको थियो।
​असमका प्रतिभावान युवाहरूलाई विश्वव्यापी रोजगारी बजारसँग जोड्ने उद्देश्यका साथ राज्य सरकारले ‘सीएम-फ्लाइट’ (मुख्यमन्त्री वैदेशिक भाषा पहल) नामक महत्त्वाकाङ्क्षी योजना अघि सारेको छ। यस योजना अन्तर्गत युवाहरूलाई वैदेशिक रोजगारीका लागि सक्षम बनाउन राज्य सरकारले प्रतिप्रशिक्षक १ लाख ५० हजार रुपैयाँ पूर्ण रूपमा प्रायोजन (स्पोन्सर) गरेको छ।
​लगानीको वर्गीकरण यस प्रकार रहेको छ:
​१ लाख रुपैयाँ: उच्चस्तरीय जापानी भाषा प्रमाणीकरण प्रशिक्षणका लागि।
​५० हजार रुपैयाँ: रोजगारी सुनिश्चित भएपछिको सहज स्थानान्तरण (रिलोकेसन) सहायताका लागि।
​मुख्यमन्त्री कार्यालय (सीएमओ) असमका अनुसार राज्य सरकार असमलाई विश्वव्यापी उद्योगहरूका लागि दक्ष जनशक्तिको प्रमुख केन्द्र (ट्यालेन्ट हब) बनाउन प्रतिबद्ध रहेको छ। मुख्यमन्त्री शर्माले ‘सीएम-फ्लाइट’ पहल मार्फत आफ्नो भविष्य निर्माण गरिरहेका विद्यार्थीहरूलाई शुभकामना दिँदै उनीहरूले भाषा दक्षता परीक्षामा उत्कृष्ट सफलता हासिल गरी असमको गौरव बढाउने विश्वास व्यक्त गरेका छन्।