​पाकिम: ​सिक्किम क्रिकेट संघ (एससीए) को तत्त्वावधानमा हिजो देखि पाकिमको दिकलिङ खेलमैदानमा ‘समर क्रिकेट क्याम्प २०२६’ (गर्खे क्रिकेट शिविर) सुरु भएको छ। विद्यालयहरूको गर्मी बिदाको सदुपयोग गर्दै पाकिम जिल्लाका विभिन्न क्षेत्रका युवा खेलाडीहरूलाई क्रिकेटको व्यावसायिक प्रशिक्षण दिने उद्देश्यले यस क्याम्पको आयोजना गरिएको हो।​पाकिम नगर पञ्चायतका एमईओ सञ्जु प्रधानको मुख्य उपस्थितिमा एक उद्घाटन समारोहबीच क्याम्पको सुरुवात गरियो। समारोहमा क्याम्प संयोजक कर्मा नामग्याल भोटियाले सहभागी खेलाडी, प्रशिक्षक, सहयोगी कर्मचारी, अभिभावक तथा अतिथिहरूलाई स्वागत गर्दै शिविरको रुपरेखा र प्रशिक्षण तालिकाबारे जानकारी गराउनुभयो।​उद्घाटन कार्यक्रमलाई सम्बोधन गर्दै मुख्य अतिथि सञ्जु प्रधानले युवा खेलाडीहरूसँग अन्तरक्रिया गर्नुभयो। उहाँले खेल जीवनमा नियमितता, समयपालना र अनुशासनको निकै ठुलो महत्त्व रहने उल्लेख गर्नुभयो। एससीए को यस प्रशिक्षण कार्यक्रमले दक्ष प्रशिक्षकहरूको रेखदेखमा युवाहरूलाई आफ्नो क्रिकेट कौशल (स्किल) सुधार्ने र अघि बढ्ने एउटा सुनौलो अवसर प्रदान गरेको उहाँले बताउनुभयो।