​दार्जीलिङ: दार्जीलिङ हिल क्षेत्रको समग्र विकास, सुशासन र जनहितका मुद्दाहरूलाई लिएर आज दार्जीलिङस्थित सर्किट हाउसमा एक उच्चस्तरीय प्रशासनिक बैठक सम्पन्न भएको छ। बैठकमा क्षेत्रको सुरक्षा व्यवस्था, प्रशासनिक समन्वय र चालु विकास योजनाहरूलाई तीव्र गति दिने विषयमा विस्तृत छलफल भयो।
​उक्त महत्त्वपूर्ण बैठकमा दार्जीलिङका जिल्ला मजिस्ट्रेट, पुलिस अधीक्षक, खरसाङका विधायक सोनाम लामा र गृह तथा पहाडी मामिला राज्यमन्त्री विशाल लामा, मुख्य रूपमा उपस्थित थिए।
​बैठक अवधिमा पहाडमा सार्वजनिक सेवाहरूमा सुधार ल्याउन, स्थानीय समस्याहरूको शीघ्र समाधान खोज्न र विभिन्न सरकारी विभागहरूबीच आपसी समन्वय सुदृढ बनाउने विषयमा रचनात्मक छलफल भएको थियो।
​बैठकपछि सञ्चार माध्यमसँग कुरा गर्दै प्रतिनिधिहरूले दार्जीलिङ हिललाई सुरक्षित, सबल र थप विकसित बनाउन सामूहिक रूपमा प्रयास गर्ने प्रतिबद्धता व्यक्त गरे। पश्चिम बङ्गाल सरकारको सुशासनको नीति अनुरूप जनताको कल्याण र प्रगतिका लागि आगामी दिनमा पनि यस्ता समन्वयकारी प्रयासहरू जारी रहने बताइएको छ।