​बागडोगरा: सिलीगुडी पुलिस कमिस्नरेट अन्तर्गत बागडोगरा थानाको पहलमा आज रङ्गापानी बजार क्षेत्रमा लागुपदार्थ विरोधी एक विशेष सचेतना कार्यक्रम आयोजना गरियो। समाजमा बढ्दै गइरहेको लागुपदार्थ दुर्व्यसनलाई नियन्त्रण गर्न र जनस्वास्थ्यको रक्षा गर्ने उद्देश्यका साथ यस कार्यक्रमको आयोजना गरिएको हो।
​कार्यक्रममा लागुपदार्थको सेवनले समाज, मानव स्वास्थ्य र मानसिक अवस्थामा पार्ने गम्भीर दुष्परिणामहरूका बारेमा स्थानीय जनतालाई विस्तृत जानकारी गराइयो। यसका साथै आफ्नो समुदायलाई लागुपदार्थको चंगुलबाट बचाउन नागरिकहरूले खेल्नुपर्ने सक्रिय भूमिकामाथि पनि जोड दिइयो।
​प्रहरी अधिकारीहरूले लागुपदार्थको दलदलमा फसेकाहरूलाई समयमै सही परामर्श (अर्ली इन्टरभेन्सन) दिनु आवश्यक रहेको बताए। समाजलाई नशामुक्त बनाउनका लागि सामुदायिक सतर्कता र कानुन व्यवस्था कायम गर्ने निकायहरूसँगको आपसी सहयोग अनि समन्वय अपरिहार्य रहेको कुरामा सहभागीहरूलाई संवेदीकरण गरियो। पश्चिम बङ्गाल पुलिसको ‘लागुपदार्थ मुक्त सिलीगुडी’ अभियान अन्तर्गत यो कार्यक्रम सम्पन्न भएको हो।