​नाम्ची: सिक्किम सरकारको वाणिज्य तथा उद्योग विभाग अन्तर्गतको जिल्ला उद्योग केन्द्र नाम्ची र सिक्किम इन्टरप्रेन्योरसिप एन्ड इकोनोमिक डेभलपमेन्ट (सीड) सेलको संयुक्त तत्वावधानमा बुधबार नाम्चीको अफिसर्स क्लबमा ‘सिक्किम राइज’ पहल सम्बन्धी एक दिवसीय सचेतना कार्यक्रमको आयोजना गरिएको छ। ‘सिक्किम इन्स्पायर्स’ अन्तर्गत सञ्चालित यस कार्यक्रमको मुख्य उद्देश्य स्थानीय नवउद्यमी, स्टार्ट-अप, महिला आविष्कारक, शिल्पी तथा स्वयं सहायता समूहहरूलाई सरकारी सहयोग र व्यावसायिक अवसरहरूबारे अवगत गराउनु रहेको थियो।
​कार्यक्रमलाई सम्बोधन गर्दै सीड सेल नाम्चीका संयुक्त जिल्ला संयोजक अविनाश पौडेलले मुख्यमन्त्री प्रेमसिंह तामाङको संरक्षकत्वमा ‘सिक्किम राइज’ पहल अघि बढाइएको जानकारी दिनुभयो। उहाँले यसलाई राज्यभरिका प्रतिभावान नवउद्यमी र उदीयमान स्टार्ट-अपहरूलाई पहिचान गरी उनीहरूको व्यावसायिक सोचलाई स्थापित गर्न सघाउने सरकारद्वारा समर्थित ‘स्टार्ट-अप ट्यालेन्ट हन्ट’ कार्यक्रमको रूपमा व्याख्या गर्नुभयो। छनोटमा परेका सहभागीहरूलाई व्यावसायिक परामर्श (मेन्टरसिप), इन्क्युबेसन सहयोग, क्षमता अभिवृद्धि र वित्तीय पहुँचमा सहयोग गरिने उहाँले स्पष्ट पार्नुभयो।
​यसै सन्दर्भमा जिल्ला उद्योग केन्द्र नाम्चीका महाप्रबन्धक दिनेश प्रधानले ‘सिक्किम राइज’ अन्तर्गत जिल्ला स्तरमा ‘आइडियाथोन उद्यमी प्रतिभा खोजी’ (आइडियाथॉन एंटरप्रेन्योरशिप टैलेंट हंट) प्रतियोगिता आयोजना हुन गइरहेको जानकारी दिनुभयो। यसका लागि आगामी जुन २६ देखि ३० सम्म आधिकारिक पोर्टल (www.sikkimrise.com) मार्फत दर्ता प्रक्रिया खुला रहनेछ। उहाँले यो प्रतियोगिता आइडिएसन (अवधारणा), प्रोटोटाइप (प्रारूप) र रेभिन्यु ग्रोथ प्रोजेक्सन (राजस्व वृद्धि प्रक्षेपण) गरी तीनवटा श्रेणीमा सञ्चालन हुने र जिल्ला स्तरका विजेताहरू राज्य स्तरको प्रतिस्पर्धामा सामेल हुने बताउनुभयो। उद्यमीहरूको सहजताका लागि नाम्चीको सेन्ट्रल पार्कमा एउटा विशेष सहायता कक्ष समेत स्थापना गरिने जानकारी उहाँले दिनुभयो।

​कार्यक्रममा सिक्किम राइजकी परियोजना प्रबन्धक निकिता लिम्बूले आवेदन प्रक्रिया र व्यावसायिक प्रस्ताव (बिजनेस प्रपोजल) तयार पार्ने प्राविधिक पक्षबारे विस्तृत प्रस्तुतीकरण दिनुभएको थियो। यसका साथै डीआईसी नाम्चीका निरीक्षक अभिषेक तामाङले भारत सरकारको ‘प्रधानमन्त्री रोजगार सृजना कार्यक्रम’ (पीएमईजीपी) को योग्यता, अनुदान र वित्तीय प्रक्रियाबारे सहभागीहरूलाई जानकारी गराउनुभयो। उक्त अवसरमा खाद्य प्रशोधन विभागकी अध्यक्ष कला प्रधान लगायत विभिन्न सञ्चारकर्मी, उद्यमी तथा विभागीय अधिकारीहरूको बाक्लो उपस्थिति रहेको थियो।