व्यावसायिक पत्रकारितामा जोड

​गान्तोक: सिक्किमका मुख्यमन्त्री प्रेमसिंह तामाङले प्रेस क्लब अफ सिक्किम (पीसीएस) को नवनिर्वाचित कार्यसमितिलाई हार्दिक बधाई तथा शुभकामना व्यक्त गर्नुभएको छ।
मुख्यमन्त्री तामाङले आफ्नो सामाजिक सञ्जाल फेसबुक मार्फत नवनिर्वाचित अध्यक्ष श्री समिरहाङ लिम्बू सहित कार्यसमितिका सम्पूर्ण पदाधिकारी तथा सदस्यहरूलाई बधाई दिनुभएको हो।
​मुख्यमन्त्रीले सार्वजनिक गर्नुभएका तस्बिरहरूमा नवनिर्वाचित कार्यसमितिका पदाधिकारीहरूलाई बधाई ज्ञापन गर्दै आगामी कार्यकालको सफलताका लागि ऐक्यबद्धता जनाइएको देखिन्छ।
​बधाई सन्देश दिँदै मुख्यमन्त्रीले नयाँ कार्यसमितिको नेतृत्वमा सिक्किमको सञ्चार क्षेत्रले थप व्यावसायिक उचाइ लिने विश्वास व्यक्त गर्नुभएको छ। उहाँले भन्नुभएको छ, “नयाँ टोलीले नैतिक र जिम्मेवार पत्रकारिताको मूल्य मान्यतालाई निरन्तर कायम राख्नेछ, सञ्चार जगत्‌लाई थप सुदृढ बनाउनेछ र सिक्किममा पत्रकारहरूको कल्याणका साथै सञ्चार क्षेत्रको उन्नतिका लागि काम गर्नेछ भन्ने कुरामा म पूर्ण रूपमा विश्वस्त छु।”
​मुख्यमन्त्रीले नवनिर्वाचित कार्यसमितिको कार्यकाल सफल र प्रभावकारी रहोस् भनी शुभकामना समेत दिनुभएको छ। प्रेस क्लब अफ सिक्किमको नयाँ नेतृत्व चयन भएसँगै सिक्किमका पत्रकारहरू र समग्र राज्यको विकासका लागि सञ्चार क्षेत्रले सकारात्मक भूमिका खेल्ने अपेक्षा गरिएको छ।