१८ अक्टोबरः हिमगिरी युथ क्लब, मंगपूको तत्त्वावधानमा आयोजित सलोनी राई स्मृति नक्आउट फूटबल टुर्नामेण्टमा मंगलवार मानेभञ्ज्यांग एफसी-ले रोमाञ्चक जीतको साथ सेमिफाइनलमा स्थान बनायो। शारदा हाई स्कूल नजिक मंगपू डीविजनल ग्राउण्डमा आज खेलिएको तेस्रो क्वार्टर फाइनल म्याचमा मानेभञ्ज्यांग एफसी-ले कालेबुङ पुलिसलाई २-१-ले पराजित गऱ्यो। विजेता टीमबाट सोनम राई र सत्यम राईले १-१ गोल गरे। कालेबुङ पुलिसबाट अनिवेशले १ गोल गरे। यस नाइन ए साइड फूटबल टुर्नामेण्टमा जम्मा २८ वटा टीमले हिस्सा लिएको छ। टुर्नामेण्टमा च्याम्पियन हुने टीमलाई आकर्षक ट्रफीको साथमा १ लाख रुपियाँको नगद पुरस्कार प्रदान गरिनेछ। यसरी नै रनरअप् हुने टीमलाई ट्रफीको साथमा ५० हजार रुपियाँको नगद पुरस्कार प्रदान गरिने आयोजक हिमगिरी युथ क्लबका कार्यकारी सदस्य रोमन आलेले बताएका छन्।