​गान्तोक: भारत सरकारकी केन्द्रिय सूक्ष्म, लघु तथा मध्यम उद्यम (एमएसएमई) अनि श्रम तथा रोजगार राज्यमन्त्री शोभा करन्दलाजे मङ्गलवार दुईदिने आधिकारिक भ्रमणको सिलसिलामा सिक्किम आइपुगेकी छन्। सिक्किम आगमनको पहिलो दिन उनले स्वर्णजयन्ती मैत्रेय मञ्जरीमा रहेको सुप्रसिद्ध अर्किडेरियमको भ्रमण गरेकी छन्।
​स्वर्णजयन्ती मैत्रेय मञ्जरी कम्प्लेक्सभित्र रहेको यो अर्किडेरियम देशकै सबैभन्दा ठूलो कूल हाउस अर्किडेरियम र अर्किड सङ्ग्रहालयको रूपमा प्रख्यात छ। यो अर्किडेरियम सिक्किमको समृद्ध पुष्प सम्पदा, जैविक विविधता संरक्षण, पारिस्थितिक पर्यटन र दिगो पर्यटन विकासप्रति राज्य सरकारको निरन्तर प्रतिबद्धताको एउटा ठूलो प्रमाणको रूपमा उभिएको छ। अत्यन्तै दुर्लभ र रैथाने अर्किड प्रजातिहरूको विस्तृत विविधता पाइने यस अर्किडेरियमले सिक्किमको प्राकृतिक पर्यावरण कति समृद्ध छ भन्ने कुरालाई दर्शाउनका साथै यहाँको प्राकृतिक सम्पदा जोगाउन भइरहेका प्रयासहरूलाई पनि उजागर गर्दछ।
​भ्रमणको अवधिमा केन्द्रिय राज्यमन्त्रीलाई सिक्किममा पाइने विभिन्न प्रकारका अर्किड प्रजातिहरूबारे विस्तृत जानकारी गराइएको थियो, जसमा राज्यभरि रेकर्ड गरिएका ५०७ प्रजातिहरू पनि सामेल छन्। यस भ्रमणको मुख्य आकर्षण चाहिँ ‘सिम्बिडियम नामो’ रहेको थियो, जुन प्रधानमन्त्री नरेन्द्र मोदीको सम्मानमा नामाकरण गरिएको एउटा अद्वितीय र विशेष अर्किड प्रजाति हो। माननीय मन्त्रीको यस भ्रमण कार्यक्रममा वाणिज्य तथा उद्योग विभागका वरिष्ठ अधिकारीगण, पुलिस प्रशासनका अधिकारीहरू र अर्किडेरियम व्यवस्थापन टोलीका सदस्यहरूको पनि विशेष उपस्थिति रहेको थियो।