असमका कलाकारहरूलाई मुख्यमन्त्रीद्वारा बधाई ज्ञापन

​गुवाहाटी: असमका मुख्यमन्त्री हिमन्त विश्व सरमाले संगीत नाटक अकादमी पुरस्कार र उस्ताद बिस्मिल्लाह खान युवा पुरस्कारद्वारा विभूषित हुनुभएका राज्यका सम्पूर्ण गुणी एवं प्रतिष्ठित कलाकारहरूलाई हार्दिक बधाई तथा शुभकामना व्यक्त गर्नुभएको छ। मुख्यमन्त्रीले आफ्नो आधिकारिक सामाजिक सञ्जाल (सोसल मिडिया) मा कलाकारहरूका तस्बिरहरू साझा गर्दै एउटा विशेष सन्देश जारी गर्नुभएको हो। आफ्नो सन्देशमा उहाँले भन्नुभएको छ कि सत्रीय नृत्य, लोक संस्कृति, नाट्य कला र सङ्गीतको क्षेत्रमा यी कलाकारहरूले पुर्‍याउँदै आउनुभएको निरन्तर योगदान र उहाँहरूको अनवरत साधनाले असमको विशिष्ट सांस्कृतिक पहिचानलाई समृद्ध बनाएर राखेको छ। राष्ट्रिय स्तरमा प्राप्त यस गरिमामय सम्मानले असमको समृद्ध सांस्कृतिक धरोहरलाई देशको मानचित्रमा अझ बढी मर्यादा र प्रतिष्ठा प्रदान गरेको कुरामा पनि उहाँले विशेष जोड दिनुभयो।
​मुख्यमन्त्री हिमन्त विश्व सरमाले राज्यको चौतर्फी विकासका साथसाथै आफ्नो मौलिक पहिचानलाई जोगाई राख्ने कुरालाई पनि प्रमुखताका साथ उल्लेख गर्नुभएको छ। उहाँले स्पष्ट रूपमा भन्नुभएको छ कि जुन गतिमा उहाँको सरकारले असमको प्रगति र विकासको यात्रालाई अघि बढाइरहेको छ, ठीक त्यही प्रतिबद्धताका साथ राज्यको समृद्ध संस्कृति, लोक परम्परा, सत्रीय कला, रङ्गमञ्च र सङ्गीतको यो अमूल्य विरासतलाई संरक्षण र प्रवर्द्धन गर्नका लागि पनि सरकार समान रूपमा प्रतिवद्ध रहेको छ। मुख्यमन्त्रीका अनुसार असमका यी सांस्कृतिक जराहरू नै राज्यको अस्तित्व र पहिचानका आधार हुन्, त्यसैले विकासको समानान्तर रूपमा यस धरोहरलाई अझ अगाडि बढाउनु राज्यको मुख्य दायित्व हो। राष्ट्रिय मञ्चमा असमका कलाकारहरूले हासिल गरेको यस ऐतिहासिक उपलब्धिले यतिबेला सम्पूर्ण राज्यको कला र संस्कृति क्षेत्रमा ठूलो उत्साह र उमङ्ग छाएको छ।