नयाँ दिल्ली: ​शनिवार राती घरेलु एलपीजी सिलिन्डरको दाममा २9 रुपियाँको वृद्धि गरिएको छ, जसको सीधा असर अब देशभरिका उपभोक्ताहरूमाथि पर्ने भएको छ। तीन महिनाको छोटो अवधिभित्र घरेलु ग्यासको दाम बढेको यो दोस्रोपल्ट हो। यसअघि गत ७ मार्चमा मात्रै प्रति सिलिन्डर ६० रुपियाँ बढाइएको थियो। समाचार एजेन्सी पीटीआईका अनुसार यो नयाँ वृद्धि लागू भएपछि आइतवारदेखि दिल्लीमा १४.२ किलोको घरेलु ग्यास सिलिन्डरको मूल्य ९४२ रुपियाँ पुगेको छ। लगातार बढिरहेको यस महँगीलाई लिएर मुख्य विपक्षी दल कांग्रेसले केन्द्र सरकारमाथि कडा प्रहार गरेको छ। कांग्रेसले सोशल मिडिया एक्समा लेख्दै प्रधानमन्त्री मोदीलाई ‘महँगी म्यान’ को संज्ञा दिएको छ र सरकारको उद्देश्य जनताबाट असुली गरेर धनी साथीहरूको तिजोरी भर्नु मात्र रहेको आरोप लगाएको छ। कांग्रेस अध्यक्ष मल्लिकार्जुन खड्गेले पनि सरकारलाई घेर्दै पछिल्लो ४ महिनामा मात्रै ग्यासको दाम ८९ रुपियाँ बढिसकेको र यसले आम जनताको भान्सा नै भस्म पार्ने स्थिति सिर्जना गरेको बताएका छन्। उनले संसदमा पश्चिम एसिया संकटका बाबजुद ४१ देशबाट इन्धन मगाउने दाबी गर्ने प्रधानमन्त्री अहिले किन मौन छन् भनी प्रश्न गरेका छन्। साथै उज्ज्वला योजनाका करोडौं परिवारले महँगीकै कारण दोस्रोपल्ट सिलिन्डर भर्न नसकेको दाबी गर्दै विगत १२ वर्षमा बीजेपी सरकारले घरेलु ग्यासमा जम्मा ५३० रुपियाँ मूल्य बढाएको आरोप उनले लगाएका छन्।
​यसै सन्दर्भमा कांग्रेस सांसद मनिष तिवारीले पनि सरकारी आयल मार्केटिङ कम्पनीहरूले वित्तीय वर्ष २०२५-२६ मा ७७,२८०.६५ करोड रुपियाँको भारी नाफा कमाएको तथ्याङ्क अघि सार्दै, जब कम्पनीहरू फाइदामा छन् भने जनतालाई किन महँगीको बोझ बोकाइँदैछ भनी प्रश्न उठाएका छन्। गत जनवरी-मार्च २०२६ को त्रैमासिकमा इसराइल र अमेरिकाले इरानमाथि आक्रमण गर्दाको संकटपूर्ण समयमा पनि यी कम्पनीहरूको नाफा ४० प्रतिशत बढेको उनले उल्लेख गरेका छन्। अर्का कांग्रेस नेता अमरिन्दर सिंह राजा वारिङले ‘अबकी बार सिलिन्डर १००० पार’ भन्दै सरकारको ‘अच्छे दिन’ को नारामाथि व्यङ्ग्य कसेका छन्। वास्तवमा गत २८ फरवरीदेखि अमेरिका र इसराइलले इरानमाथि सुरु गरेको हमलाका कारण मध्य पूर्वमा ठूलो संघर्ष चलिरहेको छ। इरानले तेल र ग्यास आपूर्तिको मुख्य मार्ग ‘होर्मुज स्ट्रेट’ ठप्प पारेपछि विश्वभरि नै ऊर्जा संकट चुलिएको हो। यसैको असरस्वरूप व्यावसायिक सिलिन्डरको दाम पनि लगातार बढेर १ जूनदेखि ३,११३ रुपियाँ पुगिसकेको छ। पेट्रोलियम मन्त्रालयका अनुसार देशका ३३.३७ करोड ग्यास उपभोक्तामध्ये १०.५८ करोड उज्ज्वला योजनाका गरीब परिवारहरू छन्, जो यस महँगीबाट सबैभन्दा बढी प्रभावित बन्नेछन्। ग्यास मात्र नभएर गत मई महिनामा मात्रै पेट्रोल र डिजेलको दाम पनि चारपल्ट बढाई कुल साढे सात रुपियाँसम्म वृद्धि गरिएको छ। सरकारले भने यसको सम्पूर्ण दोष अन्तर्राष्ट्रिय बजारमा कच्चा तेलको मूल्यमा आएको उछाल र मध्य-पूर्वको तनावलाई दिँदै आएको छ।
​