नयाँ दिल्ली: ​उत्तर कोरियाले फेरि एकपल्ट अमेरिकाका सामु आफ्नो कडा अडान स्पष्ट पारेको छ। देशका सर्वोच्च नेता किम जोङ उनकै बहिनी एवं वरिष्ठ नेत्री किम यो जोङले आफ्नो देशले कुनै पनि मूल्यमा परमाणु हतियार कार्यक्रम बन्द नगर्ने साफ शब्दमा बताएकी छन्। उनले अमेरिकाले अघि सार्दै आएको परमाणु निशस्त्रीकरणको मागलाई एउटा “पुरानो र अव्यावहारिक सोच” मात्र भएको भन्दै खारेज गरिदिएकी छन्। किम यो जोङका अनुसार उत्तर कोरिया अब एउटा स्थापित परमाणु शक्ति बनिसकेको छ र यस वास्तविकतालाई बदल्ने कूनै पनि कोसिस न त व्यावहारिक छ, न त कानुनी रूपमै सम्भव छ। उनले वैश्विक स्तरमा उत्तर कोरियाको परमाणु निशस्त्रीकरणलाई लिएर सहमति बन्दै गइरहेको भन्ने अमेरिकी दाबीलाई समेत ठाडै अस्वीकार गरिदिएकी छन्। प्योंगयाङले अमेरिका र दक्षिण कोरियामाथि आफूविरुद्ध लगातार सैन्य दबाब सिर्जना गरिरहेको आरोप लगाएको छ। किम यो जोङले विरोधीहरूले गरिरहेको लगातारको सैन्य अभ्यास र अत्याधुनिक हतियारहरूको तैनाथीका कारण नै आफ्नो देश आफ्नो परमाणु क्षमतालाई अझ धेरै मजबुत बनाउन बाध्य भएको प्रष्ट पारेकी छन्।
​विश्लेषकहरूका अनुसार सन् २०१९ मा अमेरिका र उत्तर कोरियाबीचको ऐतिहासिक वार्ता असफल भएपछि प्योंगयाङले आफ्नो परमाणु र मिसाइल कार्यक्रमलाई झन् तीव्र पारेको हो। हालै मात्र किम जोङ उनले एउटा परमाणु सामग्री उत्पादन गर्ने प्लान्टको भ्रमण गरेर हतियारको क्षमता बढाउन कडा आदेश दिएका थिए। यो नयाँ घटनाक्रम यस्तो समयमा बाहिर आएको छ जब चीनका राष्ट्रपति शी जिनपिंग उत्तर कोरिया भ्रमणको तयारीमा जुटेका छन्। चीनले आर्थिक सहयोग बढाएर यस क्षेत्रमा आफ्नो प्रभाव अझ बलियो पार्न खोजिरहेको देखिन्छ भने अर्कातिर रूससँग पनि उत्तर कोरियाको सम्बन्ध निकै गहिरिँदै गइरहेको हुनाले क्षेत्रीय शक्ति सन्तुलन नै बिग्रिने संकेत देखिएको छ। विश्लेषकहरूको मत अनुसार उत्तर कोरिया अब आफूलाई स्थायी परमाणु शक्तिको रूपमा उभ्याएर अन्तर्राष्ट्रिय स्तरमा राजनीतिक मान्यता पाउन र आफूमाथि लागेका प्रतिबन्धहरू खुकुलो पार्न चाहन्छ। उत्तर कोरियाको यो आक्रामक रूपले गर्दा कोरियाली प्रायद्वीपमा तनाव फेरि चुलिएको छ, जसले गर्दा अमेरिका र उसका सहयोगी राष्ट्रहरूका निम्ति यो एउटा ठूलो रणनीतिक चुनौती बनेको छ र आगामी दिनमा कूटनीतिक टकराव अझ बढ्ने खतरा देखिएको छ।