पटना: ​सिक्किम राज्यका लागि एउटा ठुलो र ऐतिहासिक गौरवको विषय अघि आएको छ। सिक्किम उच्च न्यायालयकी वरिष्ठ न्यायाधीश न्यायमूर्ति मीनाक्षी मदन राईले शुक्रबार पटना उच्च न्यायालयको मुख्य न्यायाधीश (चीफ जस्टिस) को रूपमा पद तथा गोपनीयताको शपथ ग्रहण गरेकी छन्। उनी सिक्किम राज्यबाट उच्च न्यायालयको मुख्य न्यायाधीश बन्ने पहिलो न्यायाधीश हुन्। यस गरिमामय पदको शपथ बिहारका राज्यपाल लेफ्टिनेन्ट जनरल सैयद अता हसनैन (सेवानिवृत्त) ले गराएका थिए। यसअघि गत जुन २ तारिखका दिन केन्द्र सरकारले न्यायमूर्ति राईको यस नयाँ नियुक्ति सम्बन्धी अधिसूचना (नोटिफिकेसन) जारी गरेको थियो।
​यस ऐतिहासिक नियुक्तिसँगै न्यायमूर्ति मीनाक्षी मदन राईले अर्को एउटा ठुलो कीर्तिमान पनि आफ्नो नाममा गरेकी छन्। उनी पटना उच्च न्यायालयको इतिहासमा मुख्य न्यायाधीशको कार्यभार सम्हाल्ने पहिलो महिला मुख्य न्यायाधीश समेत बनेकी छन्। यसअघि सिक्किम उच्च न्यायालयमा न्यायाधीशको रूपमा लामो समयसम्म आफ्नो उत्कृष्ट सेवा पुर्‍याइसकेकी न्यायमूर्ति राईको यो नयाँ जिम्मेवारीले सम्पूर्ण सिक्किम र पहाडी क्षेत्रका मानिसहरूमा हर्षको लहर ल्याएको छ।