काेलकाता: ​दक्षिण बंगालमा उकुसमुकुस गराउने गर्मीबाट तत्काल राहत मिल्ने सम्भावना छैन, तर यसैबीच धेरै इलाकाहरूमा आँधीहुरी र वर्षाको सम्भावना व्यक्त गरिएको छ। यता उत्तर बंगालका सबै जिल्लाहरूमा भने मङ्गलवारसम्म मेघगर्जन र चट्याङसहित वर्षाको क्रम जारी रहने पूर्वानुमान छ।
​मौसम विभागका अनुसार दार्जीलिङ, कालिम्पोङ, अलिपुरद्वार, जलपाईगुडी र कोचबिहारका धेरै स्थानहरूमा भारी वर्षा हुन सक्छ। मौसम वैज्ञानिकहरूका अनुसार यो मनसुनपूर्वको (प्रि-मनसुन) वर्षा हो, जसका कारण तापमानमा २ देखि ३ डिग्री सेल्सियससम्म गिरावट आउन सक्छ।
​दक्षिण बंगालमा गर्मी र उकुसमुकुस कायमै रहनेछ, यद्यपि बीच-बीचमा मेघगर्जनसहित हल्कादेखि मध्यम वर्षा हुने सम्भावना छ। शुक्रवारदेखि आइतवारको बीचमा वर्षा र आँधीहुरीको गतिविधि बढ्न सक्छ। बीरभूम, मुर्शिदाबाद, नदिया, उत्तर र दक्षिण २४ परगना अनि पूर्व मेदिनीपुरमा मौसमको प्रभाव बढी देखिन सक्छ।
​कोलकातामा तापमान ३५ देखि ३७ डिग्री सेल्सियसको बीचमा रहने अनुमान छ। दिनभरि उकुसमुकुस कायमै रहनेछ, तर केही इलाकाहरूमा मेघगर्जन र चट्याङसहित हल्का वर्षा हुन सक्छ। मौसम विभागले शुक्रवारदेखि आइतवारको बीचमा कोलकाता र आसपासका क्षेत्रहरूमा वर्षाको सम्भावना बढी रहेको बताएको छ।