नयाँ दिल्ली: ​केन्द्रीय गृह मन्त्रालयले देशको अन्तर्राष्ट्रिय सीमा सुरक्षालाई थप सुदृढ बनाउन पाकिस्तान र बंगलादेशसँग जोडिएका सीमा क्षेत्रका १५ किलोमिटरको दायराभित्र बनेका सम्पूर्ण अवैध निर्माणहरूलाई भत्काउने आदेश दिएको छ। यसअघि बिहार भ्रमणका क्रममा १० किलोमिटरको दायरा तोकिएकोमा गृह मन्त्रालयले यसलाई बढाएर १५ किलोमिटर पुर्‍याउँदै सीमा क्षेत्रमा ‘३६० डिग्री सुरक्षा ग्रिड’ बनाउने योजना अघि सारेको हो।
​गृह मन्त्री अमित शाहले राजस्थानको बीकानेरमा आयोजित उच्चस्तरीय सुरक्षा समीक्षा बैठकमा अधिकारीहरूलाई सम्बोधन गर्दै सीमावर्ती क्षेत्रका अवैध संरचनाहरूलाई हरहालतमा भत्काउन निर्देशन दिनुभएको छ। सुरक्षा निकायका अनुसार यस कदमको उद्देश्य अवैध संरचना हटाउनु मात्र नभई सीमा क्षेत्रमा निर्माण गरिएका महँगा व्यावसायिक तथा आवासीय भवनहरूका वास्तविक मालिक को हुन् र त्यस्ता निर्माणका लागि आर्थिक स्रोत कहाँबाट आयो भन्ने कुराको विस्तृत अनुसन्धान गर्नु समेत रहेको छ। बैठकमा घुसपैठ, लागुऔषध तस्करी, सीमा अतिक्रमण, आतंककारी वित्तीय लगानी र सीमापार हुने अन्य अपराधहरूलाई कडाइका साथ नियन्त्रण गर्न सीमा सुरक्षा बल, केन्द्रीय प्रत्यक्ष कर बोर्ड, नारकोटिक्स कन्ट्रोल ब्यूरो र राज्य सरकारहरूलाई विशेष चनाखो रहन निर्देशन दिइएको छ।
​यस आदेशलाई कार्यान्वयन गर्नुअघि सीमा सुरक्षा बल, सेना, स्थानीय राज्य प्रशासन र प्रहरीको संयुक्त टोलीले अवैध संरचनाहरूको पहिचान गरी सूची तयार पार्ने प्रक्रिया सुरु गर्नेछ। यसै अभियानको सिलसिलामा गृह मन्त्री शाहले आगामी २९ मे मा गुजरातको भुज क्षेत्र र घुसपैठका दृष्टिले अत्यन्तै संवेदनशील मानिने ‘हरामी नाला’ पाइन्टको विशेष निरीक्षण गर्ने कार्यक्रम रहेको छ। सो अवसरमा उहाँले सीमा सुरक्षालाई आधुनिक प्रविधियुक्त बनाउने उद्देश्यका साथ मोबाइल फोनबाट समेत सञ्चालन गर्न सकिने अत्याधुनिक पिटिजेड क्यामराहरूको कन्ट्रोल रुमको समेत निरीक्षण गर्नुहुनेछ।