​गुवाहाटी: रञ्जीत कुमार दासले बिहीबार दोस्रो पटक असम विधानसभाको अध्यक्ष पदको शपथ ग्रहण गर्दै औपचारिक रूपमा आफ्नो कार्यभार सम्हालेका छन्। शपथ ग्रहण कार्यक्रम सम्पन्न भएलगत्तै मुख्यमन्त्री डा. हिमन्त बिस्व सरमाले नवनिर्वाचित अध्यक्ष दासलाई विधानसभास्थित कार्यकक्षसम्म पुर्‍याएर आसन ग्रहण गराएका थिए।
​विधानसभामा आयोजित उक्त विशेष समारोहमा राजनीतिक क्षेत्रका वरिष्ठ व्यक्तित्वहरूको बाक्लो उपस्थिति रहेको थियो। कार्यक्रममा प्रोटेम स्पीकर चन्द्र मोहन पटवारी, पूर्व विधानसभा अध्यक्ष बिस्वजीत दैमारी, असम गण परिषदका अध्यक्ष एवं मन्त्री अतुल बोराका साथै राष्ट्रिय लोकतान्त्रिक गठबन्धन (एनडीए) का कयौँ वरिष्ठ विधायकहरूको उपस्थिति रहेको थियो। उपस्थित नेताहरूले अध्यक्ष दासलाई सफल कार्यकालको शुभकामना व्यक्त गरेका थिए।
​गरिमामय पदको शपथ लिएपछि अध्यक्ष रञ्जीत कुमार दासले संसद्को गरिमा र लोकतान्त्रिक मूल्य मान्यतालाई अक्षुण्ण राख्ने प्रतिबद्धता जनाए। यस ऐतिहासिक अवसरमा आफूलाई विश्वास गरेर अमूल्य स्नेह, समर्थन तथा सहयोग पुर्‍याएको भन्दै उनले मुख्यमन्त्री सरमा सहित गठबन्धनका सम्पूर्ण शीर्ष नेता र विधायकहरूप्रति हार्दिक आभार समेत व्यक्त गरे।