​गान्तोक: सिटिजन एक्सन पार्टी (क्याप) सिक्किमको मङ्गन जिल्ला समितिले सोमबार माङशीलास्थित पार्टी कार्यालयमा एक महत्त्वपूर्ण समन्वय बैठकको आयोजना गरेको छ। पार्टीका केन्द्रीय अध्यक्ष गणेश राईको विशेष उपस्थितिमा सम्पन्न भएको उक्त बैठकमा पार्टीको आगामी रणनीति र सङ्गठनात्मक सुदृढीकरणका विषयमा विस्तृत छलफल भएको थियो। समन्वय बैठकलाई सम्बोधन गर्दै अध्यक्ष राईले जनहित विपरीतका सरकारी नीतिहरूको जोडदार विरोध गर्ने पार्टीको दृढ प्रतिबद्धता दोहोर्‍याउनुभयो। उहाँले क्याप सिक्किमका जनताको हक-अधिकार र न्याय सुनिश्चित गर्न तथा उनीहरूको समग्र उत्थान र कल्याणका लागि निरन्तर काम गर्न प्रतिबद्ध रहेको कुरामा विशेष जोड दिनुभयो।
​पार्टीद्वारा जारी प्रेस विज्ञप्ति अनुसार यो बैठक मङ्गन जिल्ला अन्तर्गतका तीन प्रमुख निर्वाचन क्षेत्रहरू काबी लुङचोक, जङ्गु र लाचेन-मङ्गनमा पार्टी सङ्गठनलाई तल्लो तहसम्म सुदृढ बनाउने उद्देश्यमा केन्द्रित रहेको थियो। बैठकका क्रममा क्यापको संगठनात्मक संरचनालाई अझ मजबुत बनाउने र राजनीतिक गतिविधिहरूलाई तीव्रता दिनेबारे नेताहरूबीच गहन मन्थन भएको थियो। उक्त महत्त्वपूर्ण सांगठनिक बैठकमा मङ्गन जिल्लाका उपाध्यक्ष प्रभारी जोर्बु छिरिङ लेप्चा, प्रवक्ता अल्बर्ट गुरुङ, युवा अध्यक्ष टीआर नेपाल तथा मङ्गन जिल्ला महिला परिषदकी अध्यक्ष सोङ्गमित लेप्चालगायत अन्य स्थानीय नेता तथा कार्यकर्ताहरूको उल्लेखनीय उपस्थिति रहेको थियो।