गान्तोक: सिक्किम लोकसभा क्षेत्रका सांसद इन्द्रहाङ सुब्बा ले गान्तोकस्थित लोक भवनमा भारतका उपराष्ट्रपति सी. पी. राधाकृष्णन सँग शिष्टाचार भेट गर्दै सिक्किमको ५१औँ राज्यत्व दिवस समारोहमा प्रमुख अतिथिका रूपमा सहभागी भएकोमा हार्दिक आभार व्यक्त गर्नुभएको छ।‎भेटका क्रममा सांसद सुब्बाले उपराष्ट्रपतिको उपस्थितिले ऐतिहासिक अवसरलाई अझ गौरवमय र महत्वपूर्ण बनाएको उल्लेख गर्नुभयो। उहाँले सन् १९७५ मा संविधानको ३६औँ संशोधनमार्फत हिमाली राजतन्त्रबाट भारतको २२औँ राज्यका रूपमा सिक्किमको संवैधानिक यात्रालाई स्मरण गर्दै उपराष्ट्रपतिको भ्रमणले सिक्किमवासीमा उत्साह थपेको बताउनुभयो। साथै, यसले राष्ट्रको लोकतान्त्रिक तथा संवैधानिक संरचनाभित्र सिक्किमको निरन्तर महत्वलाई प्रतिबिम्बित गरेको उहाँको भनाइ थियो।सांसदले विगत पाँच दशकमा सिक्किमले शान्ति, साम्प्रदायिक सद्भाव, वातावरण संरक्षण, दिगो विकास, शिक्षा, युवा सशक्तीकरण तथा सांस्कृतिक संरक्षणका क्षेत्रमा हासिल गरेको उल्लेखनीय प्रगतिबारे पनि जानकारी गराउनुभयो। उहाँले सिक्किमको जैविक सम्पदा, रणनीतिक महत्व, सांस्कृतिक विविधता तथा शिक्षित युवा शक्तिमार्फत विकसित भारत २०४७ को लक्ष्य पूरा गर्न राज्य प्रतिबद्ध रहेको दोहोर्‍याउनुभयो।‎यस अवसरमा सांसद सुब्बाले राज्यसभाका सभापति समेत रहेका उपराष्ट्रपतिसमक्ष सिक्किमवासीका केही दीर्घकालीन माग तथा चासोहरू पनि प्रस्तुत गर्नुभयो। उहाँले अनुसूचित जनजातिको सूचीमा छुटेका १२ समुदायलाई समावेश गर्ने विषय, सिक्किम विधानसभामा लिम्बू तथा तामाङ अनुसूचित जनजातिका लागि आरक्षण व्यवस्था, साथै परमपावन १७औँ कर्मापाको सिक्किम भ्रमणको विषय उठाउनुभयो। यी विषय केवल राजनीतिक नभई सिक्किमका जनताको पहिचान, भावना, ऐतिहासिक न्याय तथा संवैधानिक आकाङ्क्षासँग जोडिएको उहाँले स्पष्ट पार्नुभयो।‎सांसदले संविधानको धारा ३७१एफ तथा सन् १९७३ को ऐतिहासिक ८ मे सम्झौताले सुनिश्चित गरेको विशेष संवैधानिक संरक्षणअन्तर्गत सिक्किमको विशिष्ट पहिचान, जनसांख्यिक सन्तुलन, परम्परा तथा सांस्कृतिक सम्पदाको संरक्षणको महत्व पनि दोहोर्‍याउनुभयो। यस सन्दर्भमा सिक्किमवासीका दीर्घकालीन आकाङ्क्षा पूरा गर्न उपराष्ट्रपतिबाट आवश्यक सहयोग र सद्भावको अपेक्षा गरिएको उहाँले बताउनुभयो। भेटवार्ताको अन्त्यमा सांसद इन्द्रहाङ सुब्बाले उपराष्ट्रपतिप्रति आफ्नो बहुमूल्य समय, आत्मीय संवाद तथा सिक्किमवासीप्रति निरन्तर सद्भाव राखेकोमा पुनः आभार व्यक्त गर्नुभयो।