​वासिङ्टन: अमेरिकी राष्ट्रपति डोनाल्ड ट्रम्पले युद्ध अन्त्यका लागि वासिङ्टनले राखेको प्रस्तावमा इरानले दिएको जवाफलाई ‘पूर्ण रूपमा अस्वीकार्य’ भन्दै खारेज गरिदिनुभएको छ। सोमबार राति सामाजिक सञ्जाल ‘ट्रुथ सोसल’ मार्फत आफ्नो धारणा सार्वजनिक गर्दै ट्रम्पले इरानको सर्तहरू आफूलाई कत्ति पनि मन नपरेको बताउनुभएको हो।
​इरानको अडान र सर्तहरू
इरानले मध्यस्थकर्ता पाकिस्तानमार्फत पठाएको १४ बुँदे जवाफमा अमेरिकाले लगाएको तेल निर्यातमाथिको प्रतिबन्ध हटाउनुपर्ने, लेबनानमा युद्धविराम हुनुपर्ने र जफत गरिएको इरानी रकम फुकुवा गर्नुपर्ने माग राखेको छ। साथै, होर्मुज जलडमरूमध्यमा आफ्नो नियन्त्रण हुनुपर्ने इरानको अडान छ। यद्यपि, इरानले परमाणु मुद्दामा ३० दिनभित्र छलफल गर्न सकिने भन्दै केही लचकता भने देखाएको छ।
​अमेरिकाको माग र ट्रम्पको असन्तुष्टि
अमेरिकाले इरानसँग ६० प्रतिशत शुद्धतासम्मको संवर्धित युरेनियम हस्तान्तरण गर्नुपर्ने र आगामी २० वर्षसम्म युरेनियम संवर्द्धन नगर्ने प्रतिबद्धता मागेको छ। ट्रम्प प्रशासनले इरानका सबै परमाणु केन्द्रहरू नष्ट गर्नुपर्ने, ब्यालिस्टिक मिसाइलको भण्डारमा कटौती गर्नुपर्ने र हमास तथा हिजबुल्लाह जस्ता समूहलाई दिँदै आएको समर्थन बन्द गर्नुपर्ने सर्त राखेको छ। ट्रम्पका निकट सहयोगी रिपब्लिकन सिनेटर लिन्डसे ग्राहमले पनि इरानको रवैया नबदलिए अमेरिकाले आफ्नो रणनीति परिवर्तन गरी सैन्य विकल्पमा जान सक्ने संकेत गर्नुभएको छ।
​इरानको कडा जवाफ
ट्रम्पको असन्तुष्टिप्रति इरानले पनि कडा प्रतिक्रिया दिएको छ। इरानी अधिकारीहरूले आफूहरू ट्रम्पलाई खुसी पार्नका लागि योजना नबनाउने बरु देशको हितमा काम गर्ने बताएका छन्। इरानी विदेश मन्त्रालयले जहाँ कूटनीतिको आवश्यकता पर्छ त्यहाँ वार्ता गर्ने तर देशको रक्षाका लागि लड्न पनि पछि नहट्ने स्पष्ट पारेको छ। यस घटनाक्रमले मध्यपूर्वमा पुन: युद्धको बादल मडारिन थालेको छ।