​कोलकाता: पश्चिम बंगालमा दोस्रो चरणको मतदान सुरु हुनुअघि राजनीतिक माहोल तातिएको छ। दक्षिण २४ परगना जिल्लाको फलतामा निर्वाचन आयोगद्वारा खटाइएको उत्तर प्रदेश क्याडरका आईपीएस अधिकारी अजय पाल शर्मा र तृणमूल कांग्रेस (टीएमसी) का उम्मेदवार जहांगीर खानबीचको विवादले नयाँ मोड लिएको छ। टीएमसी समर्थकहरूले आईपीएस अधिकारी शर्माले पार्टी कार्यकर्ता र स्थानीय नेताहरूलाई अनावश्यक रूपमा डराउने र धम्क्याउने काम गरेको आरोप लगाउँदै उनीविरुद्ध प्रदर्शन गरेका छन्। टीएमसीका वरिष्ठ नेताहरूले समेत प्रहरी अधिकारीले आफ्नो पदीय मर्यादा नाघेर काम गरिरहेको टिप्पणी गरेका छन्।
​निर्वाचन आयोगका अनुसार टीएमसी उम्मेदवार खानका मानिसहरूले मतदाताहरूको परिचयपत्र कब्जामा लिएको र उनीहरूलाई धम्काइरहेको उजुरी परेपछि आईपीएस अधिकारी शर्माले सो क्षेत्रको अनुगमन गरेका थिए। उत्तर प्रदेशमा आफ्नो कडा कार्यशैलीका कारण ‘सिंघम’ उपनामले चिनिने शर्माले यसपटक पनि मतदातालाई प्रभावित पार्ने कुनै पनि गैरकानुनी कार्यलाई छुट नदिने अडान राखेका छन्। उनले सोमबार राति उम्मेदवारको घरमै पुगेर प्रशासनले निष्पक्ष चुनावका लागि कडा कदम चाल्ने चेतावनी दिएपछि विवाद थप चर्किएको हो।
​यस चेतावनीको जवाफ दिँदै टीएमसी उम्मेदवार जहांगीर खानले चलचित्रको संवादमार्फत प्रतिवाद गरेका छन्। उनले यो बंगाल भएको र यहाँ बाहिरका अधिकारीहरूको धम्की नचल्ने बताउँदै आफूलाई ‘पुष्पा’ र अधिकारीलाई ‘सिंघम’ को संज्ञा दिएका छन्। खानले भाजपाको इसारामा आएका प्रहरी अधिकारीहरूले लोकतन्त्रको उपहास गरिरहेको आरोप लगाउँदै कुनै पनि किसिमको दबाबलाई स्वीकार नगर्ने स्पष्ट पारेका छन्। आयोगले दोस्रो चरणको मतदानलाई धाँधलीरहित बनाउन खटाएका ९५ विशेष पर्यवेक्षकहरूमध्ये शर्मा एक प्रभावशाली अधिकारी मानिन्छन्।