नयाँ दिल्ली: ​रुसी सरकारले इन्टरनेट र साइबर स्पेसमा आफ्नो पकड बलियो बनाउँदै लगेपछि त्यहाँका आम नागरिक र उद्यमीहरूमा तीव्र असन्तुष्टि देखिएको छ। सुरक्षाको बहाना बनाउँदै रुसी अधिकारीहरूले टेलिग्राम र ह्वाट्सएप जस्ता विश्वव्यापी म्यासेजिङ एपहरूमाथि कडा प्रतिबन्ध लगाएका छन्, जसका कारण मोबाइल इन्टरनेट सेवा व्यापक रूपमा प्रभावित भएको छ। यस प्रतिबन्धको विरोधमा मस्कोस्थित राष्ट्रपति कार्यालय बाहिर धेरै नागरिकहरूले इन्टरनेट सेन्सरसिप अन्त्य गर्न माग गर्दै उजुरी दर्ता गराएका छन्। विशेष गरी साना व्यवसायीहरूले इन्टरनेट अवरोधका कारण आफ्नो व्यापार धराशायी भएको र दैनिक आम्दानीमा ठूलो गिरावट आएको गुनासो गरेका छन्।
​रुसी सरकारले हाल ‘स्वायत्त इन्टरनेट’ (सोभरेन इन्टरनेट) को अवधारणालाई अघि सार्दै ‘मैक्स’ नामक सरकारी म्यासेजिङ एप प्रयोग गर्न दबाब दिइरहेको छ। तर, सरकारले आफ्नो गोप्य सन्देशहरू निगरानी गर्ने डरले सर्वसाधारणहरू यो एप प्रयोग गर्न हच्किएका छन्। राष्ट्रपति पुटिनले सुरक्षाका लागि यस्ता कदम आवश्यक रहेको बताए तापनि स्वतन्त्र समाचार साइट र भीपीएन माथिको कडाइले रुसलाई बाँकी विश्वबाट अलग्याउन खोजिएको विश्लेषण गरिएको छ। बढ्दो महँगी र युद्धको थकानका बीच इन्टरनेटमाथिको यो नियन्त्रणले पुटिनको लोकप्रियतामा समेत ह्रास ल्याउन थालेको सर्वेक्षणहरूले देखाएका छन्।