​उद्यमीहरूलाई आधुनिक बजार रणनीति र गुणस्तरीय प्याकेजिङमा जोड दिन मन्त्री लेप्चाको आग्रह

​ मङ्गन: ​तीन दिवसीय ‘सिक्किम उत्सव २०२६’ अन्तर्गतको मङ्गन च्याप्टर आइतबार मङ्गन नगर पञ्चायत हलमा सफलतापूर्वक सम्पन्न भएको छ। वाणिज्य तथा उद्योग विभागद्वारा आयोजित उक्त कार्यक्रमको समापन समारोहमा सिक्किम सरकारका वन तथा वातावरण मन्त्री पिन्चो नामग्याल लेप्चा मुख्य अतिथिको रूपमा उपस्थित थिए।
​समापन कार्यक्रमको औपचारिक सुरुवातअघि मुख्य अतिथि लेप्चाले विभिन्न विभाग र स्थानीय उद्यमीहरूद्वारा राखिएका प्रदर्शनी स्टलहरूको निरीक्षण गरेका थिए। सो क्रममा उनले उद्यमीहरूसँग प्रत्यक्ष अन्तरक्रिया गर्दै स्थानीय खाद्य उत्पादन, हस्तकला र परम्परागत पोशाकहरूको गुणस्तर र विविधताको सराहना गरे।
​समारोहलाई सम्बोधन गर्दै मन्त्री लेप्चाले मङ्गन जिल्लामा तीन दिनसम्म सफलतापूर्वक कार्यक्रम सञ्चालन गरेकोमा वाणिज्य तथा उद्योग विभागलाई धन्यवाद ज्ञापन गरे। उनले सहभागी सम्पूर्ण उद्यमी तथा स्टल सञ्चालकहरूलाई बधाई दिँदै उनीहरूको व्यवसायिक सफलताको कामना गरे।
​”आगामी दिनहरूमा उद्यमशीलताले नै आत्मनिर्भर भविष्यको जग बसाल्नेछ। मुख्यमन्त्री प्रेमसिंह तामाङको ‘सुनौलो, समृद्ध र समर्थ सिक्किम’ को सपना साकार पार्न यस्ता कार्यक्रमले राज्यभर समावेशी आर्थिक वृद्धिलाई प्रोत्साहन दिनेछ,” मन्त्री लेप्चाले भने।
​सिक्किमको अर्गानिक पहिचानलाई विश्व बजारमा पुर्‍याउन ‘भ्यालु एडिसन’ (मूल्य अभिवृद्धि) को महत्वमाथि प्रकाश पार्दै उनले थपे, “हामीसँग उत्कृष्ट जैविक कच्चा पदार्थहरू प्रशस्त छन्। अबको आवश्यकता भनेको बजारको माग अनुरूप उत्कृष्ट प्याकेजिङ, ब्रान्डिङ र प्रस्तुतीकरण हो। उद्यमीहरूले आधुनिक बजार रणनीति अपनाए मात्र हामीले बाह्य बजारमा प्रतिस्पर्धा गर्न सक्छौँ।”

उनले सरकारको निरन्तर सहयोग र जनताको दिगो प्रयासबाट सिक्किम चाँडै नै देशकै आर्थिक वृद्धि र उद्यमशील विकासको नमुना राज्य बन्ने विश्वास समेत व्यक्त गरे। कार्यक्रममा स्थानीय जनप्रतिनिधि, सरकारी अधिकारी र ठूलो संख्यामा स्थानीय बासिन्दाहरूको उपस्थिति रहेको थियो।