नयाँ दिल्ली: ​इरान र अमेरिका–इजरायलबीच भएको १४ दिने युद्धविरामको सहमति १२ घण्टा पनि टिक्न सकेन। बुधबार बिहान शान्तिको आशा जगाउँदै गरिएको युद्धविरामको घोषणालाई लत्याउँदै इजरायल र अमेरिकाले इरानको ठूलो तेल रिफाइनरीमा आक्रमण गरेपछि मध्यपूर्व पुनः युद्धको भुमरीमा फसेको छ।
​इरानको कडा प्रतिवाद
आफ्नो तेल भण्डारमा हमला भएलगत्तै इरानले छिमेकी खाडी मुलुकहरू संयुक्त अरब इमिरेट्स (यूएई) र कुवेतमाथि मिसाइल तथा ड्रोन प्रहार सुरु गरेको छ। अमेरिकी सैन्य अखडालाई आफ्नो भूमि प्रयोग गर्न दिएको र त्यहीँबाट इरानमाथि आक्रमण भएको भन्दै तेहरानले ती देशहरूलाई निशाना बनाएको हो। बुधबार साँझदेखि सुरु भएको यो प्रत्याक्रमणले यस क्षेत्रमा ठूलो मानवीय र आर्थिक संकट निम्त्याउने संकेत गरेको छ।
​कच्चा तेलको मूल्य बढ्यो, विश्व बजारमा त्रास
युद्धविराम भंग भएसँगै अन्तर्राष्ट्रिय बजारमा कच्चा तेलको मूल्यमा एकाएक वृद्धि भएको छ। केही समयदेखि घटिरहेको तेलको भाउ समाचार सार्वजनिक भएको केही मिनेटमै १ प्रतिशतभन्दा बढीले बढेको छ। युद्ध लम्बिँदै गएमा तेलको मूल्यले ‘यू-टर्न’ लिने र यसले विश्वभर महँगी बढाउनुका साथै सेयर बजारमा भारी गिरावट ल्याउने निश्चित देखिएको छ। दुई हप्ताको शान्ति सम्झौता १२ घण्टा पनि नटिक्दा कूटनीतिक प्रयासहरू समेत असफल सावित भएका छन् ।