गान्ताेक: सिक्किमका मुख्यमन्त्री प्रेमसिंह तामाङकाे अध्यक्षतामा, सम्पन्न भवनमा सिक्किम एङ्गलर्स एसोसिएसनसँगको पूर्वतयारी बैठक सम्पन्न भएकाे छ। बैठकमा मत्स्य, पर्यटन, सडक तथा पुल, वन, र खेलकुद विभागका अधिकारीहरु पनि उपस्थित भए।
प्राप्त जानकारी अनुसार बैठकमा सिक्किमलाई प्रमुख एङ्ग्लिङ गन्तव्यको रूपमा विकास गर्ने सम्भावनाहरूको अन्वेषणमा केन्द्रित गरियो। यसबारेमा मुख्यमन्त्री प्रेमसिंह तामाङले संजाल मार्फत जानकारी गराए कि माछा मार्दा उनीहरूलाई हानि नगरी ‘क्याच एण्ड रिलिज’ अभ्यास प्रवर्द्धन गर्ने विषयमा छलफल गरियो, जसले स्वच्छ ताल र विविध माछा प्रजातिहरूलाई प्रस्तुत गर्ने अवसर दिनेछ।
साथै मुख्यमन्त्रीले एङ्ग्लिङलाई दिगो खेलकुदको रूपमा प्रवर्द्धन गर्ने उपायहरू, जलजीवन संरक्षण गर्ने, जिम्मेवार माछा मार्ने अभ्यासप्रति सचेतना फैलाउने, र प्रकृतिमा आधारित पर्यटन मार्फत स्थानीय अर्थतन्त्रलाई सहयोग पुर्याउने योजना पनि छलफलमा राखिएको बताए।