सिलगढी: सिलीगुडीको सेवक राेड क्षेत्रमा आइतबार राति लापरवाहीपूर्वक चलाइएको चारचक्के सवारीका कारण एक युवक घाइते भएका छन्। उक्त घटनामा उनी मृत्युदेखि बालबाल बच्न सफल भएका हुन्। सो समय भारतले बीस–बीस ओभरको विश्वकप जितेको खुशीयालीमा शहरभर उत्सव मनाइँदै थियो।
प्राप्त जानकारी अनुसार घटना सेवक सडकसँग जोडिएको गल्लीमा, पानीटंकी पुलिस चौकी अन्तर्गत पर्ने क्षेत्रमा भएको हो। मोड लिने क्रममा चारचक्के सवारीले स्कुटीलाई ठक्कर दिएको बताइएको छ। त्यसपछि दुवै सवारीका चालकबीच विवाद भएको थियो।
घटनापछि स्थानीय बासिन्दा ठूलो संख्यामा घटनास्थलमा जम्मा भएका थिए। भीड देखेपछि चारचक्के सवारीका चालकले त्यहाँबाट भाग्ने प्रयास गरेको बताइन्छ। सो क्रममा एक युवकले सवारी रोक्नका लागि गाडीको अगाडिको भागमा चढेका थिए। तर चालकले सवारी तीव्र गतिमा अगाडि बढाउँदा ती युवक सडकमा खसेर घाइते भएका थिए।
त्यसपछि स्थानीय बासिन्दाले सवारीलाई पछ्याएर रोकेका थिए। खबर पाएपछि पानीटंकी प्रहरी चौकीका प्रहरी घटनास्थलमा पुगेका थिए। पुलिसले सवारी नियन्त्रणमा लिएर चालकलाई पक्राउ गरेको छ।
पक्राउ पर्ने व्यक्ति सिलीगुडीको पञ्जाबी पारा निवासी केतन गोयल रहेको पुलिसले जनाएको छ। घाइते युवकले पछि पानीटंकी पुलिस चौकीमा लिखित उजुरी दिएका छन्।
पुलिसले पक्राउ परेका चालकलाई सोमबार अदालतमा पेश गरेको छ। घाइते युवकले घटनाको निष्पक्ष छानबिन गरी दोषीलाई कडा कारबाही गर्न माग गरेका छन्।
उल्लेखनीय कुरा के छ भने पछिल्ला दिनहरूमा सेवक सडक क्षेत्रमा यस्तै प्रकारका घटनाहरू पटक–पटक भइरहेको छन्। हालै भएको एक ठक्करपछि भाग्ने घटनामा एक युवकको मृत्यु भएको थियो भने एक महिला गम्भीर घाइते भएकी थिइन्। यसअघि स्कुटी चलाइरहेकी एक महिलालाई सवारीले ठक्कर दिएको अर्को घटना पनि सार्वजनिक भएको थियो।
लगातार भइरहेका दुर्घटनाका कारण स्थानीय बासिन्दामा डर र आक्रोश बढ्दै गएको छ। पुलिसको प्रयास हुँदाहुँदै पनि लापरवाहीपूर्वक सवारी चलाउने घटनाप्रति चिन्ता बढिरहेको छ।