गान्तोक: नेपाली भाषा र साहित्यको संरक्षण, संवर्द्धन र प्रवर्द्धनका उद्देश्यलाई ध्यानमा राख्दै नेपाली साहित्य परिषद् सिक्किमले आज डा. मनोरथ दाहालद्वारा लिखित लेख-संग्रह “चेतनाको ज्योति” को १४औँ कार्यकारिणी समितिको तत्वावधानमा पहिलो कार्यक्रम आयोजना गर्‍यो। समारोहको अध्यक्षता परिषद्का अध्यक्ष हरि ढुङ्गेलले गरेका थिए, र प्रमुख अतिथि प्राध्यापक रुद्र पौडेल थिए।
साहित्यकार डा. मनोरथ दाहालको कृतिको लोकार्पण कार्यक्रममा प्रमुख वक्ता वरिष्ठ साहित्यकार विजयकुमार सुब्बाले कृतिमाथि आफ्नो स्रोत-वक्ता समीक्षा प्रस्तुत गर्दै यसलाई नेपाली समाज, संस्कृति र चेतनाको गहिरो आयामलाई उजागर गर्ने विचारप्रधान कृतिको रूपमा व्याख्या गरे। उनले “चेतनाको ज्योति”लाई समकालीन नेपाली साहित्यको एउटा महत्वपूर्ण योगदान भने।
साहित्यकार डीआर नेपाल, कुबेरचन्द्र दाहाल लगायतका प्रतिष्ठित साहित्यकार, बुद्धिजीवी र साहित्यप्रेमीहरूको विशेष उपस्थिति रहेको उक्त कार्यक्रमको प्रचार-प्रसार सचिव हेमराज अधिकारीले जानकारी दिएका छन्।
कार्यक्रमको प्रारम्भमा परिषद्का उपाध्यक्ष नीलम न्यौपानेले स्वागत मन्तव्य व्यक्त गर्दै परिषद्को दायित्व र प्रतिबद्धताको कुरा गर्दै नेपाली भाषा र साहित्यको समृद्ध परम्परालाई निरन्तर अघि बढाउने बताइन्।
समारोहको प्रमुख आकर्षण कवि शिवप्रसाद न्यौपाने र परिषद्को कोषाध्यक्ष जीएस सुब्बा द्वारा प्रस्तुत कविता वाचनले कार्यक्रमलाई सिर्जनात्मक र भावपूर्ण बनाएको थियो।
मुख्य अतिथि प्राध्यापक रुद्र पौडेलले नेपाली भाषा र साहित्यलाई मात्र अभिव्यक्तिको माध्यम नभई हाम्रो सांस्कृतिक पहिचान र सभ्यताको आधारको रूपमा हेरिरहेका छन्। उनले नेपाली साहित्यको संरक्षण र संवर्द्धनका लागि सम्पूर्ण समाजलाई एकजुट भएर निरन्तर लाग्नुपर्ने आवश्यक्ताका बारेमा चर्चा गरे।
समारोहको समापन गर्दै सभाध्यक्ष हरि ढुङ्गेलले नेपाली साहित्य परिषद् सिक्किमको भविष्यका योजनाहरू बारेमा आफ्नो सम्बोधन दिँदै, परिषद्ले नेपाली साहित्य र सिर्जनशीलताको उन्नयनका लागि आगामी दिनमा पनि सशक्त कदम चाल्ने प्रतिबद्धता व्यक्त गरे।
यस कार्यक्रममा सहभागी भएका साहित्यकार र बुद्धिजीवीहरूले नेपाली साहित्यको विकास र समकालीन चिन्तनका विषयमा विचार विनिमय गरेका थिए।