कोलकाता: पश्चिम बंगालका राज्यपाल डा. सी. वी. आनन्द बोसले सोमबार कोलकातास्थित लोक भवनमा आयोजित भव्य सम्मान समारोहमा राष्ट्रिय क्याडेट कोर (एनसीसी) निर्देशनालय, पश्चिम बंगाल तथा सिक्किमका उत्कृष्ट क्याडेटहरूलाई सम्मान गरेका छन्।
कार्यक्रममा एनसीसी निर्देशनालय पश्चिम बंगाल तथा सिक्किमका अतिरिक्त महानिदेशक मेजर जनरल अमरपाल सिंह चहल (सेना मेडल) सहित वरिष्ठ सैन्य तथा असैनिक अधिकारीहरूको उपस्थिति रहेको थियो।
यस अवसरमा सेना, नौसेना र वायु सेना विङका ५५ जना क्याडेटलाई उत्कृष्ट प्रदर्शन, नेतृत्व क्षमता र राष्ट्र सेवामा पुर्‍याएको योगदानका लागि राज्यपाल पदक प्रदान गरियो। साथै, सर्वश्रेष्ठ सेना, नौसेना र वायु सेना एनसीसी युनिट तथा सर्वश्रेष्ठ ग्रुपलाई ट्रफी र ब्यानरद्वारा सम्मान गरियो।
राज्यपालले गणतन्त्र दिवस परेड तथा गणतन्त्र दिवस क्याम्प (आरडीसी) २०२६ मा पश्चिम बंगाल तथा सिक्किम एनसीसी टोलीले देखाएको उत्कृष्ट प्रदर्शनको विशेष प्रशंसा गरे। सो अवसरमा क्याडेट सार्जेन्ट प्रीति शर्मा देशभरबाट वरिष्ठ विङकी सर्वश्रेष्ठ वायु सेना क्याडेट घोषित भइन् भने आरडीसी टोलीले सर्वश्रेष्ठ लाइन एरिया ट्रफी पनि जित्न सफल भयो।
समारोहलाई सम्बोधन गर्दै राज्यपालले युवाको चरित्र निर्माण, अनुशासन र राष्ट्र निर्माणमा एनसीसीको भूमिका अत्यन्त महत्वपूर्ण रहेको उल्लेख गरे। कार्यक्रमको वातावरण गर्व, प्रेरणा र उत्साहले भरिएको थियो।