न्यू जलपाईगुडी (एनजेपी): एनजेपी जीआरपीको स्पेशल अपरेशन ग्रुप (एसओजी) टोलीले ठूलो सफलता हासिल गर्दै रेलमार्फत भइरहेको नक्कली नोटको तस्करीको पर्दाफास गरेको छ। कामाख्या–अगरतला एक्सप्रेसबाट एक जना यात्रुलाई पक्राउ गर्दै प्रहरीले ठूलो परिमाणमा नक्कली भारतीय मुद्रा जफत गरेको हो।
पक्राउ परेका अभियुक्त बिहार राज्यको पूर्णिया जिल्लाका निवासी मोहम्मद अकरम अनवर (२७) भएको पहिचान गरिएको छ। अभियुक्तको साथबाट कुल २ लाख ७४ हजार ५ सय रुपैयाँ बराबरको नक्कली नोट बरामद गरिएको छ।
जीआरपी स्रोतका अनुसार अभियुक्त कामाख्या रेलवे स्टेशनबाट रेलमा चढेका थिए। एनजेपी रेलवे स्टेशनमा पहिले नै सतर्क अवस्थामा रहेको एसओजी टोलीले गोप्य सूचनाका आधारमा खोजतलास अभियान सञ्चालन गरेको थियो। आइतबार साँझ कामाख्या–अगरतला एक्सप्रेस प्लेटफर्म नम्बर ३ मा आइपुग्नेबित्तिकै टोलीले रेलभित्र व्यापक खोजी गरेको थियो।
शंकाको आधारमा अभियुक्तलाई नियन्त्रणमा लिएर जाँच गर्दा उनको झोलाबाट पाँच वटा कालो प्याकेट फेला परेका थिए, जसमा नक्कली नोट राखिएको थियो। प्रारम्भिक सोधपुछका क्रममा अभियुक्तले अज्ञात नम्बरबाट व्हाट्सएपमार्फत सम्पर्क भएको खुलासा गरेका छन्। उनले कामाख्यामा एक व्यक्तिले नक्कली नोटका बन्डलहरू दिएर ती बिहार पुर्‍याउन निर्देशन दिएको बयान दिएका छन्।
घटनासम्बन्धी थप सञ्जाल र संलग्न व्यक्तिहरूको पहिचानका लागि जीआरपीले गहन अनुसन्धान अघि बढाएको छ।